NDA allies ten BJP te an nawr ngam salh salh hle

Lok Sabha-ah a mala sorkarna siam thei tura seat an ngah tawk loh avangin BJP te chu NDA an thawhpui party ten an ngam salh salh hle a. NDA-ah hian Coalition-era veteran N Chandrababu Naidu leh Nitish Kumar te pawh telin NDA meeting neih hmasak berah an demand fiah takin an tarlang nia sawi a ni a. An demand tak te sawilan la ni lo mahse inremna a awm theih nan ruahmanna kalpui mek tia sawi a ni.
Lok Sabha seat 16 nei Naidu party TDP te Andra Pradesh State Assembly a chakna chang bawk te chuan minister panga phutin chung zingah chuan Minister of State for Finance leh Lok Sabha Speaker post an ngiat tia sawi a ni a. Hei bakah hian TDP te chuan portfolio pawimawh Roads, Panchayati Raj, Health leh Education te an phut tia sawi a ni bawk.
Lok Sabha-a MP 12 nei mek JDU te chuan Cabinet minister pahnih bakah MoS pakhat an ngiat bawk nia sawi a ni a. Chutah pawh Railways Minister post chu an demand bik tia sawi a ni.
Hei bakah hian Nitish Kumar kaihhruai party te chuan NDA sorkar hnuaiah Common Minimum Programme bakah coordination committee din ni se an ti bawk a. Common Minimum Programme chu coalition a awm party tena agenda intawm neia an kalpui theihna tur a ni.
Atal Bihari Vajpayee sorkar lai khan he committee ang hi din niin Goerge Fernandes kha convener a hman a ni a. Tunah chuan din a nih chuan Nitish Kumar chu convener ni theia ngaih a ni.
Seat hnih neitu JDS te chuan an leader leh MP HD Kumaraswamy chu central ministerial post pek an ngiat bawk a. HD Deve Gowda party te hian farmers’ party intiin Agriculture Ministry chu an ngiat deuh nia sawi a ni.
NDA ally dang BJP tena an tihlawm ngai bawk tur chu Eknath Shinde kaihhruai Shiv Sena te niin Maharashtra-ah seat sarih ngawt an la a, anni bakah hian Chirag Pawan kaihhruai LJP te seat nga nei te an awm bawk. Actor-politician Pawan Kalyan a Jana Sena seat hnih nei ten phut an nei em a la chiang lo va.
Modi sorkar kalta pahnihah khan Apna Dal (Sobelal) leader Anupriya Patel khan minister nihna a chang a. Kuminah erawh seat hnih nei reng thin kha seat khat chauh an chang a, ministerial seat a chang zui dawn em a chiang lo.
BJP te chuan seat 240 la in majority mark an phaklohna chu seat 32 a ni a, TDP leh JDU te pahnih seat lak belhkhawm chu 28 a ni a, anni bakah BJP allies dang te nen seat 272 chu an khum var var a ni.
BJP te chuan ministry pawimawh panga Cabinet Committee on security hnuai awm – defence, finance, home affairs leh external affairs te chu midang pek an remti lo tia sawi a ni bawk a.
Hei bakah hian infrastructure lam a bik takin road transport and highways leh a welfare agenda tana pawimawh te a hum duh tih a ni bawk.
Tun hnai kum 10 chhunga Narendra Modi sorkar tilangsar bertu pakhat chu road transport and highway a ni a, Nitin Gadkari kaihhruaina hnuaiah India hmun kilkhawr ber ber te pawh chhunpawpin a awm tawh a, BJP te chuan he portfolio hi hloh an duh lo tia sawi a ni bawk.
JDU ten Railway chan an ngiat chungin BJP te chuan railway bikah reforms nasa tak an kalpui mek chu tihbahlah an remti dawn lo tia sawi a ni bawk a. Mahse, anamhni a majority an neih tlat loh avangin sorkar siam tur chuan an thawhpuite ngiat chu an tihhlawhtlin a ngai dawn bawk si a ni. Chuvang chuan JDU te chu portfolio dang panchayati raj, rural development te pek tumin, TDP te pawh civil aviation leh steel te pek an tum tia sawi a ni a. Heng bakah hian BJP te chuan tourism, skill development, science and technology leh earth sciences te pawh an thawhpui te pek an remti tia sawi a ni bawk.
INDIA Oppsoition bloc te erawhin seat 232 chauh la in kalzel dan tur an hruaitu lawkten an ngaihtuah ve reng bawk a.
Congress president Kharge chuan, “INDIA bloc chuan India mipui tena thlawpna nasa tak min lantir avangin lawmthu kan sawi a ni. Mipui ten duhthlanna an lantir hi BJP leh an policy inhuatna leh eirukna an duhlohzia an lantirna a ni a. Chu mai bakah Constitution humhim duhna leh thil man sang, hna vang leh crony capitalism an duhlohna leh democracy humhim an duhna lantirna a ni a. INDIA bloc chuan Modi kaihrhuai BJP te fascist rorelna a bei chhunzawm zel ang” tiin a sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More