Department hmunhma leh hmalakna en

Minister C Lalsawivunga chuan kar kalta khan Khawzawl leh Champhai district-a a department chan, a bikin Animal Husbandry & Veterinary hmunhma leh hmalakna a tlawh a. Live Animal Market Ruantlang, Khuangleng leh Khawbung Dispensary bakah Samthang khua tlawhin, department thawktute, khawtlang hruaitute leh ran vulhtute a kawm.
Department hmalakna leh hmasawnna ruhrel siam chu kuthnathawktute tana siam a ni a. Department hmalakna leh ran vulhtute dinhmun dik tak chu ral thlir mai loa, a hmun ngeia enfiahin hlawkna tam tak a pe tih C Lalsawivunga hian a sawi. Khawchhak tlangdung chu ranvulh lama tui leh theihna nasa tak nei a ni, tiin, AH& Vety sector hnuaiah a theih chin chinah khawchhak tlangdungah theihtawp chhuaha hmalak tum a ni tih a sawi a ni.
AH & Vety department-in ran chaw siam nan vaimim kg ah Rs.25 velin a lei thin tih minister hian a sawi a. Ran chawa intodelh tur leh kuthnathawktuten hlawkna an tel theih nan Champhai district-ah pilot project-in vaimin leh bekang chinkawp tum a ni a. Vaimim kg khat Rs 25 vela lei bakah support price Rs 3-4 vel pe thei tura ruahman a ni tih a sawi bawk.
Art & Culture minister ni bawk C Lalsawivunga chuan Hla Kungpui Mual behchhanin thu leh hla kutpui nei tura inrawnkhawm a ni tawh tih a sawi a. Tih puitlin a nih ngei a beisei thu a sawi a ni.
Champhai district hma hian Khawzawl a tlawh a. District AH & Vety office leh hospital building sak thar leh Boar Semen Station tlawhin, an dinhmun leh mamawh an sawi ho. Khawtlang hruaitute nen an inkawmnaah LAD minister ni bawk hian Khawzawlah DLAO office a awm theih nan theihtawp chhuah a tum tih a sawi.