Kim Kardashian a thawhpui avangin Swift fans tan Sabrina Carpenter a insawifiah
Taylor Swift ‘The Eras Tour’ tan tir lamah khan Sabrina Carpenter hi Swift hian a concert opener atan a hmang deuh char char a, hei hian Sabrina Carpenter larna pawh a belhchhah a tih loh theih loh, Swift nen pawh an inkawmngeih hle a, tunah chuan a hla hit ‘Please Please Please’ leh ‘Espresso’ te pawh Billboard Hot 100 chart No.2 leh No.3 a ni vang tawh.
Mahse, Sabrina Carpenter hi Kim Kardashian SKIMS campaign-ah a tel ve tlat mai a, hei hi Swift fans lamin an ngaithei mang tlat lo. Taylor Swift leh Kim Kardashian te inkar boruak that loh dan chu Swift fans tan hai theih a ni lo ang. Hetiang a nih laia Swift thiantha ni chunga Kim Kardashian-i company SKIMS campaign-a a tel hi an sawisel ta a ni.
Mahse, Carpenter chuan, “He thilah hi chuan ani (Swift) nen hian thil kan sawi dun nasa a. Ani hi ka ngaina takzet a, a tawp thlengin ka support zel ang. Ka tan thil mak ni lo hi, mi ten eng eng emaw an lo sawi leh a, tih tur dang an neih loh lutuk vang mai mai a ni,” a ti.
Carpenter chuan, “Tute emaw anga tih tur nei lo, bial zìm tê chauh ngaihtuah thin nih tir min tum a. Chutiang ka ni lo, a chhan chu hna ka ngah lutuk,” a ti bawk.
Sabrina Carpenter chuan SKIMS spring campaign a a inhnamhnawih ve avangin Taylor Swift nena an inlaichinnain a tawrh phah lo ni a sawiin, “Kan pahnihin ka inbe nasa a, kan duh leh ngainat zawng te leh ngaihsan zawng te pawh kan sawi nasa a ti bawk.
Sabrina Carpenter hi Taylor Swift musical partner rei tak lo ni tawh Jack Antonoff nen pawh an thawk dun a, Taylor Swift album thar ‘The Tortured Poets Department’-a hla thenkhat te pawh a tihchhuah hmaa lo ngaithla hmasatu pawlah te pawh a tang pha hial a. Carpenter chuan, “’But Daddy I Love Him’ hla pawh kha a tlangzarh hmain min ngaihthlak tir a, ka duh ber te zinga a tel,” a ti.
Sabrina Carpenter hi a lar tan ta hle a, chutihrualin Swift te nena inkhaikhin chi rual a nih loh thu sawiin, “Ani chu khìtah ka dah. Ka nun, ka career leh kawng zawh lai te hi ani (Swift) nena khaikhin chi a ni teuh lo, a nê pawh ka ek pha lo,” a ti bawk.