Remna Ni champha 38-na hmang Laldenga inhnukdawk ngam fak

Zalenna sual avanga MNF rammute leh India sawrkarin inremna thuthlung an ziah champha chu Zirtawpni khan hman a ni a. Hmannaa tel chief minister Lalduhoma chuan Mizo mipuiin zalenna sual kan zawh loh avanga Pu Laldenga inhnuhdawh ngamna chu fakawm a tih thu a sawi.Remna Ni hi June 30 a ni a. Kuminah Pathiannia a tlak avangin he Ni puala hun buatsaih thin Mizo Zirlai Pawl chuan June 28 – Zirtawpni khan hun a hmang. Chief minister chuan ram hruaitute chu mihring ve tho an nih avangin an thil tih zawng zawng a fuh vek thei bik loa, hlawtlin ni awm thin mah se, hlawhchham chang a awm lo thei lo tih a sawi. “MNF-in zalenna an sual pawh a hlawhtling ta bik loa, Pu Laldenga’n zalenna sual chu Mizo mipuiin kan zo lo tih hriain huaisen taka inhnukdawkin, India sawrkar nen inremna an ziak a. Hetianga thil a kal fuh lo tih hria a, remna duha a inhnukdawk thei kha a fakawm hle,” a ti.
Mizoramin remna a neihna kalkawng chu a thui hle a, amah ngei pawhin a hna kalsanin remna zawngin ke a pen a tul a, a hnu zelah MP atanga ban hmasak ber a ni ta hial tih Lalduhoma hian a sawi.
Tun tuma MZP-in a chawimawi, kum 1981-a MLA atanga bang ta te chu remna a awm theih nana MLA bang hmasa ber an ni a. An phu tawk chawimawina an dawng lo fo nia a hriat thu sawiin, “Chawimawi an phu hle a ni,” a ti.
Rambuai laia hnam sipai, nunna chante kha ram tan an thi lem lem loa, Mizoram an hmangaih avangin an martar tak tak a, zah leh chawimawi an phu em em tih chief minister hian a sawi bawk.
“Inremna thuthlung ziah dawna Pu Laldenga demand tihhlawhtlin loh zingah ‘Greater Mizoram’ a tel a; tunhnaiah Zohnathlakte delh chin ramah buaina leh harsatna a thleng a, hei hian ngaihtuahna a ti thui hle. Zohnahthlak inpumkhatna tur hian India ram chhungah Greater Mizoram kan din hmasak phawt a tul a, India sawrkar laka buaina siam loin, inpumkhatna kawngah hma kan lak thiam a ngai,” a ti
MZP president H Lalthianghlima chuan, pawl zawng zawng leh mi zawng huap Remna Ni lawmna an buatsaih thin tih a sawi a. Sawrkar pawhin MZP huaihawt hi remtih sakin, tu ta bik mah niloin kan zavaia tan a ni tih pawm a, tel tlang vek turin a sawm tih a sawi.
Kum 2018 atang khan MZP hian Remna Ni lawmna a buatsaih a; sawrkar pawhin a hrana lawm loin an telpui thin. Remna a awm theih nana mi pawimawhte chu chawimawina a hlan thin a, kuminah hian remna a awm theih nana kum 1981-a MLA an nihna bansan – JH Rothuama, P Lalupa, Lalthanzauva leh Ngurchhina te hnenah chawimawina an hlan a. JH Rothuama leh P Lalupa an la dam.