CM leh sports minister-in lawmpui

Mizoram chief minister Lalduhoma leh sports minister Lalnghinglova Hmar chuan Zirtawpni zan All India Football Federation (AIFF) annual awards ceremony-a chawimawina lian dawngtu Mizo footballer pahnih Lallianzuala Chhangte leh David Lalhlansangate lawmpuina thu a hrang ve vein social media lamah an tarchhuak.
Nimin lama tarlan tawh angin, Mumbai City FC player pawimawh LZ-a hian AIFF Men’s Player of the Year 2023-24 dawngin, nikum pawh khan India best player chawimawina hi a lo dawn tawh a; Vairengte tlangval David Lalhlansanga chu AIFF Promising Men’s Player of the Year-a thlan a ni ve bawk.
CM Lalduhoma chuan, “Mizo hnam hi kan hriat theih chin, kan pi leh pute hun lai atangin hnam huaisen leh taima kan ni. Mizo tlangval pahnih – Lallianzuala Chhangte leh David Lalhlansangate’n India ram pumpui football-ah chawimawina nopui an han dawm thei hi Mizo hnam nihna diktak an dinchhuahpui a ni ka ti lo thei lo!
“A lawmawm ka ti takzet! Anmahni leh an chhungte pawh ka lawmpui e!
“Kan Mizo tlangvalte pahnih hian Mizo hnam min chawimawi a, tin, kan hnam damna min thlentu tur Pathian an chawimawi tel bawk a ni. Hei hian min tilawm leh zual em em a ni!
“An kal zelna turah duhsakna sang ber ka hlan a, Pathianin a hruai zel ang. Mizo thalaite entawn tur, beiseina petu tur lo ni zel rawh se!.”
Lunglei Zohnuai tlangval Lallianzuala kha a thlawhna cancel a nih lah tak thut avangin award semna hmun New Delhi kha lawmman dawng hmanin a thleng zo ve ta lo a, a award dawn hlu tak chu Mizoram sports minister leh AIFF hruaitu ni bawk Lalnghinglova Hmarin a lo dawnsak a, a hnuah Tete Hmar hian social media kaltlangin Mizo player pahnih hlawhtlinna chungchang heti hian a tarchhuak:
“All India Football Federation-in Best Men’s Player-a an thlan Lallianzuala Chhangte leh Promising Player of the Year-a an thlan David Lalhlansangate thinlung takin ka lawmpui e.
“Lianzuala hi thlawhtheihna a thlawh loh avangin award dawng turin a kal thei lo a, vawiin lamah vawi engemawzat a kal theih hram dan kan ngaihtuah a, a remchang thei ta si lo – a lawmman ka dawnsak.
“Indian football-a mi pawimawh te, union sports minister leh Indian sports hotu rualte hmaa Mizo tlangval lawmman dawn thu an puang chu ngaihthlak a nuam takzet e,” tiin.