Adele-i’n a concert laklawh lai chawlin Olympics 100M final a en

Adele pawhin 2024 Paris Olympics hi a tuipui hle a ni ngei ang, niminpiah a Munich-a a concert lak lawh laiin, metre 100 hmeichhe intlansiak final a en duh tlat mai a, a concert lak lawh lai pawh sawi thei lovin an chawl a, concert chhimtu mipui te hmuh theih turin screen lianah 100m final chu an tilang ta a, an thlir ta thup mai a ni.
Concert chhimtu mipui 75,000 vel te nen chuan second 11 chhung intlansiak chu an thlir a, Julien Alfred-i gold medal dawng lawmpuiin kut an beng hluah hluah mai a ni. Julien Alfred hi Saint Lucia atanga Olympics gold medal dawng thei hmasa ber a ni a, 100m intlansiak hi second 10.72-ah a tlan thleng hman a, gold medal a dawng ta a, US hmeichhe tlan chak Sha’carri Richardson leh Melissa Jefferson ten silver leh bronze an dawng ve thung.
Alfred-i’n history siama gold a dawng hi Adele chuan concert chhimtu mipuite chu lawmpui tura sawmin, “I lawmpui teh ang u. Show tan leh dawn tawh ila, St. Lucia a ropui e,” a ti.
Adele hian Munich-ah hian zan 10 show a nei tawh a, hemi pual hian Adele Arena an siam a, Zirtawpni zan atang khan show hi nei tan tawhin, August ni 31-ah a kharna a nei dawn a ni. Munich-a a show tan zanah pawh Adele hian Olympics chungchang sawi chhuakin, “World-class athlete-te chevel ka thlir lai hian, ‘E he, a tum dan a fuh lo deuh em? Ekhai a ke a dah ngil tawh lo,’ tih velte ka lo sawi ve thin a. Mahse, kei ve em hian an tih ang an tive chiah ila chu ka thi thak ang. An tih ang tlem azawng pawh, an movement eng ang pawh hi tih tum ve ila chu ka thih pui chiang ang,” a lo ti taw bawk.