MSCW chairperson a bang

Kum dik lo hmanga Mizoram State Commission for Women chairperson nihna chelha puh mek C Lalchhandami chuan banna a thehlut.
Mizoram State Commission for Women (MSCW) chairperson C Lalchhandami hian September 7 khan Social Welfare secretary hnenah ziakin banna a thehlut a. Hotute duhsaknaa 2024 March 8-a MSCW chairpernson atana ruat a nih hnu ah a mawhphurhna hi theihtawp chhuahin a chelh zui a. He hna a thawh chhung hun reilote, thla 5 velah case hearing 102 a nei hman a, hlawhtlinna (success story) zaa 80 a awm tawh tih a sawi. A awm hma, 2019 May atanga 2024 February thlengin case hearing neih zat chu 86 niin, chumi atanga thlir chuan a chairperson chhung hian hmasawnna nasa tak Commission-in hmu tih a hriat theih thu a sawi a ni.
Hetihlai hian a pian kum chungchangah eptu party atanga beihna nasa tak a tawk a. Kum 65 thleng chelh theih a nih avangin a kum dik tak ang chuan la thawk chhunzawm zel thei tur mah se, hetiang boruak karah chuan chak leh tha tak, phur taka hnathawh zui a harsa dawn tih a sawi.
A awmna, ZPM party hruaitute nen an inbiakrawn hnuah party inchirhthehna boruak tha lo tak awm zui tur hi tha lo a ti a. Women Commission ngei pawh a zahawmna vawnhim zel a nih theihnan chairperson a nihna atanga inhnuhdawh mai thaa hria in, banna hi a thehlut ta tih a sawi a ni.
Tarlan tawh thin angin, MSCW chairperson C Lalchhandami hi MNF party chuan sawrkar hna atanga a pension kum leh, Aizawl Municipal Corporation inthlana a in candidate-naa a kum zat a tarlan dan nena chhutin, MSCW chairperson-a ruat a nih hian, kum bithliah phal chin – kum 65 chu a pel daih tawh tih sawiin, kum dik lo hmanga hna chelh lui lo turi leh 2024 September 9 tlai dar 5.00 hmaa banna thehlut turin an phut a. Social Welfare minister chuan chairperson atana ruat a nih hmaa a birth certificate thehlut tura an tihnaah, he certificate atanga chhut chuan kum 65 a la tlin loh avanga ruat an ni tih a sawi ve thung. MNF Legal Board chuan birth certificate pakhat aia tam nei nia puhin C Lalchhandami lakah hian police-ah FIR an thehlut zui a, hetiang boruak karah hian September 7 (Inrinni) khan C Lalchhandama hian banna hi a thehlut zui ta a, a banna hi pawmsak ngei turin Social Welfare secretary hi a ngen a ni.