Khawvel huap intihsiakah India aiawhin Mizo pahnih tel dawn

France-ah khawvel huapin thiamthil intihsiak neih a ni dawn a. India aiawha kal zingah Mizo thalai pahnih an tel.
WorldSkills 2024 hi September 10-15 chhung hian Lyon France-ah neih a ni dawn a. Ram 70 chuang atangin thiamthil entir tur mi 1400 chuang an fuankhawm dawn a, an intihsiak dawn a ni.
India aiawhin mi 60 an tel dawn a, an zingah hian Mizoram atangin Emily VL Thakimi d/o D Rosangzuala, Khatla leh Maximus Lalruatkima s/o Lalmalsawma Hmar, Dawrpui te an tel. Maximus hi floristry huanga tel a ni a, Emily hi fashion technology huanga tel tur a ni.
India aiawh tur hian state tinah district level atangin state level-a thlan an nih hnu ah, state tin aiawhte hi kumin May 15-19 khan Delhi-ah IndiaSkills 2024 buatsaih a ni a. Mizo thalai pahnih hian gold medal la in, India ai awh tura thlan an ni.
Mizoramah hian Labour, Employment, Skill Development & Entrepreneurship (LESDE) department-in huaihawta neih a ni a. Emily hi Women’s Polytechnic Aizawl-ah garment technology zir chhuak a ni a; Maximus hi Pachhunga University College-a Public Administration III semester zirlai a ni.