US envoy-in thudik puang turin China nawr zui

US envoy to China chuan Covid-19 origin chungchangah China chu thudik puang chhuak turin a ngen a.
Hei hi tun hnai lawka US media tena federal agency ten pandemic chu Wuhan-a laboratory atanga putru nia an ngaih thu an sawi an chhuah zui hnua bawhzuina a ni.
China foreign ministry chuan chhang let nghalin Covid-19 khawvel puma leng chu ‘science lam thil a ni a, politicised chi a ni lo’ an ti ve thung.
Washington-Beijing inlaichinna hi thla kaltaa US-in Chinese spy balloon an kahthlak hnuah a chhe zual hle a ni.
Ambassador Nicholas Burns chuan US Chamber of Commerce event neihnaah China chu ‘Kum thum kaltaa Covid-19 crisis intanna Wuhan a thil thleng chungchangah thudik tak a puanchhuah a ngai a ni’ tiin a sawi.
Pathianni khan US media-te chuan US Department of Energy te report tarlangin chutah chuan classified intelligence report-ah virus chu tihpalh thila Wuhan laboratory atanga putru ni ngeia an ngaih thu an sawina an chhuah a ni.
Energy department te chuan engtiangin nge virus chu a intan dan erawh thutlukna an la siam theih loh thu an sawi thung a. US agency hrang hrang ten Covid-10 chungchangah thutlukna hrang hrang neiin FBI te chuan kum 2021 daih tawh khan virus chu lab atanga putchhuak ngeia an ngaih thu an lo sawi tawh a.
Zirchianna an neih thenkhatah chuan Covid-19 chu Wuhan a Huanan seafood leh wildlife market a ransa atanga mihringa inkaichhawn angin an ngai thung.
October 2021 khan US top spy official unclassified report chuan US intelligence agency pali te chuan virus chu ransa atanga mihringin an kaichhawn ni ngeia ngaih theih a ni an lo ti tawh bawk.
Thawhtanni khan White House national security thupuangtu John Kirby pawhin finfiahna a la awm thei lo a ti a. “Tun thlengin thutlukna siam theih a la ni lo va, US sorkar chuan Covid-19 pandemic origin chungchangah thutlukna a la siam lo,” tiin a sawi.
China foreign ministry thupuangtu chuan lab leak theory chu hnawl nghalin Mao Ning chuan US investigator te chu ‘China sawichhiata virus origin politicised lo’ turin a ngen zui bawk.
China hian a tir atangin UN pawhin Covid-19 chhuahna zirchian a tumnaah rokhawlhna a lo siamsak tawh a, a hnua a phalah erawh engmah rinhlelh tur a awm lo an ti thung.