Goal khung rang McTominay

Zirtawpni Serie A inkhel pakhata mikhual Como laka Napoli-in 3-1 hnehna an chan tumin Scott McTominay chuan an thah atanga second 25-na lekah mualneitu team goal hmahruai a khung a, Naples khawpuia Diego Armando Maradona stadium mipuite pawh goal lawm turin an inpeihchhuak hman lo a ni ber!
McTominay hian an thah fel hlawt tihah hian Romelu Lukaku siamsak atangin goal hmahruai a tilut a; Napoli goal hnih dang hi Belgian Lukaku leh David Neres-te thawh a ni ve thung.
He result hmang hian Antonio Conte team Napoli chuan Serie A standing-ah hma an hruai chhunzawm zel a, match sarih an khelh tawh atanga point 16 hmuin, nizan result tarlan hman loh inkhel pakhata Cagliari hmachhawn Juventus lakah point liin an sang.
Inrinni zanah Marcus Thuram-a hat-trick hmangin Inter Milan chuan player 10-a khel Torino lakah 3-2 hnehna an chang ve bawk.
San Siro match-ah hian mikhual Torino defender Guillermo Maripan chu hma takah red card hmanga hnawhchhuah a nih avangin Inter hian hun rei tak a tam zawk ni chungin an khel a, heti chung hian an kawtkaiah hnehna an sualchhuak thei hram a ni.
He thu buatsaih lai thleng hian point 14 nei chungin Internazionale hian table-ah pahnihna an luah a; point hnihin hmahruaitu Napoli an pha lo a; parukna dinhmun luahtu Torino kutah point 11 a tlingkhawm ve tawh thung.
Mateo Retegui hat-trick hmangin Inrinni inkhel dangah Atalanta pawhin 5-1-in an mikhual Genoa an sawp ve bawk.