Thil puak vanga in pathum chimah mi pali thi

Thil puak vanga in pathum chimah mi pali thi
Madhya Pradesh-a Morena district-a Thawhtanni zan zanlai khan thil pual avanga chenna in pathum chimah mi pali an thi a, mi dang pangain hliam an tuar bawk.
Police chuan he thil hi Rathore Colony, Kotwali police station huam chhunga thleng niin an sawi a. An thlen rualin municipal corporation puihna nen chhanchhuah hna an thawk nghal.
“Zan dar 12:00 leh zing dar 1:00 inkar velah thu kan dawng a. Police leh municipal corporation team thleng nghalin hna thawh nghal a ni,” tiin City Superintendent of Police (CSP) Ravi Soner chuan ANI a hrilh.
“A rang thei ang bera chhanchhuah hna thawh zawh kan tum a. Ruang pahnih kan hmu tawh a, in chim karah hian pahnih an la awm a ni,” a ti.
Hliam tuar mi pangate chu enkawl nghal an nih thu a sawi bawk.
Morena SP Sameer Saurabh chuan thil puah chhan hi an la hre lo va, Forensic Science Laboratory (FSL) team-in an chhui zawhah hriat an beisei tih a sawi.
In chim zinga mi neitu pakhat, Vasudev Rathore-a chuan a mo, kum 28 mi a thih ve thu leh gunpowder puak a nih a rin thu a sawi.
A senghawinaah hian LPG burte pawh hmuh a ni tih thuthar lakhawmtute hnenah a sawi bawk.
FSL team hian gunpowder nge gas bur puak zawk an hre thuai dawn niin CSP Soner chuan a sawi a. Hliam tuarte hi Gwalior-ah lak niin Morena district hospital-a doctor-te chuan an sawi.