ICC prosecutor-in Min Aung Hlaing-a manna thupek chhuah duh

ICC prosecutor-in Min Aung Hlaing-a manna thupek chhuah duh
International Criminal Court (ICC) chief prosecutor chuan Myanmar sipai hruaitu, Min Aung Hlaing-a chu Rohingya Muslim-te laka rawng taka a chet avangin manna thupek chhuah a duh thu a sawi.
Karim Khan-a hian Min Aung Hlaing-a’n Rohingya-te tiduhdaha loh theih lohva an thenawm, Bangladesh-a an tlanchhiat chhanah puhna tha tawk tak a nei tih a sawi.
Kum 2017 khan Rohingya sang telin Myanmar an chhuahsan a, UN chuan Burmese sipaiten an suat hlauh vanga tlanchhia niin a sawi. Myanmar sorkar erawh chuan hei hi phain an bitumte chu Rohingya hel pawl chauh an nih zawk thu an sawi ve thung.
Rohingya-te hi Rohingya helhovin Myanmar-a police post 30 chuang an beih hnu lawk, kum 2017 khan beih tan an ni.
Sipaiten an khua an halsak a, an in leh lo an tihchhiatsak a, civil mite beiin an that bawk niin an sawi a ni.
Damdawi lama tanpuitu pawl, Médecins Sans Frontières (MSF) chuan thla khat chhung emaw lek tharum thawhna thlengah hian naupang kum nga hnuai lam 730 vel telin Rohingya 6,700 chuang thah an ni hman niin an sawi.
Amnesty International chuan Myanmar sipaite hian Rohingya hmeichhia leh hmeichhe naupangte chu an sawisa a, an pawngsual bawk niin a sawi.
Rohingya-te tawrhna hi khawvel pawhin a ngaihvenin a laknatpui hle a, chiang zawka thil hriat duhna awm mah se tam tak chu finfiah theih a ni lo va. Hetih laia Burmese hruaitu, Aung San Suu Kyi-i pawh a general-te chet dan a puan duh loh avangin sawisel a kai deuh phah hial a ni.
Myanmar hi ICC-a tel ve tura hming ziak ve lo a ni a, sipai hotu sang laka thubuai siam hi thil theih pawh a ni chiah rih lo.
Hetih lai hian ICC prosecutor thenkhat chuan pawikhawihna, a bikin Bangladesh-a tlanchhiat ngaih phahna thleng hi thubuai siamsak theihna a ni tih an sawi a, Dhaka hi ICC pawmtu zingah a tel a ni. Kum nga zet an chhui hnuah chief prosecutor chuan finfiahna tha tawk an nei tawh a, Min Aung Hlaing-a laka international arrest warrant chhuah hi a phut ta tih a sawi.
ICC judge pathum thutna panel chuan prosecutor ngenna hi an ngaihtuah dawn a ni.
Mihring dikna chanvo humhalhtu pawlte chuan Min Aung Hlaing-a man duhna a awm ta chu lawmawm an tih thu an sawi a, ‘lawmna ni a ni’ ti hial pawh an awm. Myanmar hi tunah hian tual chhungah an indo mek a, Min Aung Hlaing-a kaihhruai sipai sorkar hi a bet zawkah an tang mek.
Min Aung Hlaing-a hi kum 2021-a mipui thlan, Aung Sang Suu Kyi-i kaihhruai sorkar paih thlaa an hruaitu kha a ni a.
Ram pawna a zin chhuak lo hle a, hei vang hian manna tur thupek hi chhuah mah se The Hague-a court-ah a din mai erawh a rinawm rih lo.