IndiGo-in Mahindra lakah lawsuit an file
Mahindra-in an electric SUV an tlangzarh thar, nakkum February thlaa hralh chhuah tan an tum Mahindra BE 6e chuan a engamah hmain harsatna a tawk nghal pang mai a, IndiGo airline-in an aviation call sign nen a inang tiin court-ah an zualko ta a ni.
India-a airline lian ber IndiGo enkawltu Interglobe Aviation Ltd. chuan Delhi High Court-ah thu hi thlenin, Mahindra-in an electric lirthei thar hminga an hman ‘6e’ tih chu IndiGo aviation call signal a nih thu leh a, an trademark a nih thu an thlen a, Mahindra lam chuan harsatna awm lova an chinfel dan pawmtlan theih a awm an rin thu an sawi ve thung.
Mahindra sawi dan takin BE 6e tih hi ‘Be Sexy’ tih a lerh leh mawi zawnga an hmanna a ni a, mahse, IndiGo hian an trademark a nih avangin an nuih liampui mai mai thei tlat lo. IndiGo hian ‘6E Link’ tih hi Class 9 (electronic advertising display), 35 (advertising services relating to transport & delivery services) leh 39 (Airline services for the transport of passengers and goods) hnuaiah an trademark a, Mahindra ian BE 6e hming hi Class 12 (motor vehicles and related equipment) hnuaiah an trademark ve thung a ni.
Court hearing neih hun tur hi puan a la ni lo va, Mahindra chuan hemi chungchangah hian thuchhuah siamin an electric SUV hming atan BE 6e an hman chuan engmah a tibuai lova an hriat thu sawiin, IndiGo nen chuan an chetvelna a inang lo lutuk a, hriat pawlh leh ngaih hai theihna risk pawh a awm lo niin an sawi ve thung.
IndiGo-in Mahindra lakah lawsuit an file
Get real time updates directly on you device, subscribe now.
Prev Post
Next Post