Aizawl Chuap’ ni thei AR ram luah “Khauh takin kan humhalh dawn” – Chief minister

Centre for Environment & Social Justice (CESJ) chuan Assam Rifles ram luah chhuahsan tura ramngaw awm dan an zirchiang a. Ramngaw dina Aizawl tana boruak tha leh thianghlim pechhuaktu, ‘Aizawl Chuap’ tia chhal theihah ngaiin, an zirchianna a bua an siam chu Inrinni khan chief minister Lalduhoma’n a tlangzarh. Assam Rifles ram luah chhunga thing chhiarpui leh zirchianna – Tree Inventory & Carbon Storage of Assam Rifle Campus, Aizawl Mizoram lehkhabu tlangzarhtu chief minister chuan, khawvelin sustainable development a ngaipawimawh tawh a, hmasawnna hnathawh hi khuarei daih leh leilung tichhe lo thei ang ber an ni zel tawh tih a sawi a. He kawng hi kan zawh ve a ngai tih hria in, theihtawp an chhuah dawn tih a sawi.
Chutihrualin hmasawnna kan duh a, hmasawnna hna hian environment a nek bawk si avangin hmasawnna man pek a ngai ve tih hriat a tha tih a sawi a. An kal dan tur tinrengah inrawnkhawm zel a tiam a ni.
Assam Rifles chhuahsan tur rama hmalak mek dan sawiin, “Tunah hian a ram tehin joint survey kan nei mek a, ram hi khauh takin kan humhalh dawn a ni,” chief minister hian a ti. Tlangzarh inkhawmah hian Environment Forest & Climate Change minister Lalthansanga’n thu a sawi bawk.
CESJ working chairman Vanramchhuangi chuan CESJ ngaihdanah chuan environment humhalh hi hmasa ber se, hmasawnna hi environment tichhe lo thei ang berin, environment humhimna dan zawm tlat chungin thawh nise an duh tih a sawi a ni.
CESJ aiawha helai rama thing awm zat chhiarpui neia zirchiangtu hi PC Zothanpuii leh Michael Lalramdingliana an ni a. Kumin September 26 khan bul an tan a ni. PC Zothanpuii sawi danin, quadrat sampling technique hmangin thing chhiarpui neih a ni a. Assam Rifles ram luah chhungah hian thing chi hrang hrang 480 chhiar niin, species 80, families 31 leh genera 59 chhinchhiah a ni. Fabaceae family chu he zirchhianna bialah hian an tam ber. International Union for Conservation of Nature (IUCN ) classification atanga a landanin, critically endangered (CR) pali, endangered (EN) pakhat leh vulnerable (VU) panga a awm a ni.
He hmun hian carbon dioxide (CO2e) 5766.73 vel a hip lut tih hmuhchhuah a ni a, hei hian boruak inthlak danglam do kawnga a chanvo pawimawh tak a tilang chiang hlea ngaih a ni. Hei bakah hian thingin tangkaina hrang hrang an neih a sawi danin, chi 71 chu ei leh in, ramhmul damdawi atan hman theih an ni a; 14 chu environment control theihnaah a pui a, 29 chuan nunphung emaw intihhlimna atan emawa hlutna a pe a; 7 chuan ecosystem hnathawh dangte a pui a ni.
Assam Rifles ram luah, chhuah lam hi YMA Bethlehem Branch chuan kum 2008 atang khan “Aizawl Chuap” tia hming phuahin hma an lo la tawh a. Tunhmaa Bawngpu par an tih, thenkhatin Vaivakawn an tih awmna hmun zau tak chu ramngaw tha takah a chang tawh a ni.
Centre for Environment & Social Justice chuan, mihring tam tak chenna khawpuia ramngaw (urban forest) hi khawpui thang zelah thing leh mau tan inhumhimna hmun pawimawh an ni a. Heng thil pawimawh -biodiversity, boruak siamthatnaah leh mipui hamthatnaah nasa takin an pui tih a sawi. Aizawla hmun laili ber Assam Rifles ram luah chhunga thing leh mau awmna ‘Aizawl Chuap’ tia chhal theih ram hi zirchhian niin, Assam Rifles-in kum za tel an lo luah tawha thing an humhalh hi thingkung engzat nge lo awm a, boruak tihthianghlimna (carbon dioxide hip) lama a puih theih dan a rawn tarlang ta tih a sawii.
‘He zirchianna hian khawpui chhunga hmun hring/ thing leh mau humhalh a ngaih zia, nungchate chenna hmun pawimawh tak a nih dan leh boruak chhe hip theihna natural system a pawimawhna a rawn tilang a. Climate change dona piahlamah heng hmun hian khawpui boruak quality a ti tha a, khawpui lum zel tur a vawng dai thei a, khawpui chhunga chengte rilru hahdamnaah a pui bawk,’ CESJ chuan a ti.