Synod Inkhawmpui tiak ta
Synod Inkhawmpui tiak ta
2024 Synod Inkhawmpui, December ni 3 atanga Mission Vengthlang Presbyterian Kohhran biak ina neih chu Chawlhni khan zawh fel a ni.
Tun tum hi Synod Inkhawmpui vawi 101-na a ni a, 1961-ah vawi hnih an Inkhawmpui avangin a kum zawng chuan a kum 100-na a ni.
December ni 3 chhunah committee pawimawh an thu a, zanah Vantlang Pathian Biak Inkhawm an nei. A tukah Moderator kal chhuak Rev R Vanlalnghaka’n Rev RC Vanlalnghaka hnenah Moderator nihna a hlan a, rorel an tan nghal. Chhun lamah ni tin ro an rel a, ruahman lawk angin Inrinni-ah Synod Rorel hi an zo thei. Zan lamah mipui huap inkhawm a awm ziah bawk.
Chawlhni chawhmaah Pro Pastor atana lak thar mi 20-te dah nghehna hun an hmang a, Pastor atan mi 17 an nemnghet bawk. Chawhnu lamah Moderator-in Lalpa Zanriah a theh a, nikum Synod Inkhawmpui leh kumin Synod Inkhawmpui inkara boral Minister/Pastor pasarihte sunna hun an hmang bawk. Zan inkhawmah Moderator kal chhuakin thuchah a sawi a, inkhawmpui an zo ta a ni.
Synod Inkhawmpui hi Mission Vengthlang Pastor Bial-in an thleng a, palai inziak lut hi mi 2126, riak lut 1018 leh langa kal mi 1108 an ni. A thlengtu bial hi mikhual 2000 chuang thleng turin an lo inbuatsaih a, mikhual nei turin chhungkaw 479 an lo inring a ni. Mizoram state pawn atanga kal an awm nual a, kalna hla ber chu Wales atanga kal pahnihte an ni.
Vanduaithlak takin Inkhawmpui-a ‘duty’ pakhat Zomuanpuii (48) chu a chanvo tha taka a tih laiin heart attack vangin a boral a, lainat a hlawh hle.
2024 Synod Inkhawmpuiah hian Moderator chu Rev Rc Lalnghakliana a ni, Secretary (Sr) Rev PB Mankima, Secretary (Jr) Upa Vanlalsawma Siakeng, Finance Officer Rev VL Luaia Hranleh leh Rev PC Pachhunga, Statistician Rev H Laltlanthanga te an ni.
Nakkum Synod Inkhawmpui chu Dawrpui Pastor Bial-in Zarkawt Kohhran biak inah an thleng ang.
8 Synod Vawi 1-na 1925-ah Kohhran 250 a awm a, a kum 100-na 2024-ah Kohhran 1,169 a awm
8 Synod Vawi 1-na, 1925-ah khan Minister 13 an awm a, a kum 100-na 2024-ah chuan minister 603 an awm
8 1925-ah Kohhran Upa 181 an awm a, 2024-ah Kohhran Upa 5,659 an awm
8 1925-ah Kohhran member 34,893 an awm a, 2024-ah Kohhran member 6,39,289, mipa 3,09,056 leh hmeichhia 3,30,233 an awm
8 2023-24 chhunga naupiang zat chu 8,096 a ni a, mipa 4,185 leh hmeichhia 3,911 an ni. 2023-24 chhunga mitthi zat chu 4,421 a ni a, mipa 2,915 leh hmeichhia 1,606 an ni.
8 Sunday School 1,624 a awm a, zirlai 4,56,208 leh zirtirtu 58,251 an awm