ATP Tour champion thei upa ber Monfils

ATP Tour champion thei upa ber Monfils
World number six lai lo kai chho ve tawh Gael Monfils chuan Inrinni khan Auckland khawpuia ASB Classic final-ah 6-3 6-4-a Belgium player Zizou Berg hneh chungin shistory thar a siam a, kum 38 leh thla li mi ni chungin ATP Tour singles title la thei upa ber a ni.
Kum 1990-a ATP Tour bul tan a nih hnuah Swiss great Roger Federer kha champion thei upa ber a ni reng a, kum 2019-a kum 38 leh thla hnih mi ni chunga Basel title a lak hmang khan he record hi siamin, tunah France player hian a career-a tour-level title 13-na hlawhchhuak chungin Federer a hmakhalh ta a ni.
Record thar siam tura hnehna a chan hnuah Monfils chuan, “Hei zet chu ka tan a hlu khawp mai. Chutih rualin kum hi chu number mai a ni a, kan la chechhuak zel dawn a, high-quality tennis khelh zui zel theih ka la inbeisei,” tiin chawlh lam a la hawi lo tih a sawichhuak.
Auckland-a a hnehna sualchhuah hmangin Monfils kha kum 1977 daih tawha kum 43 mi ni chunga Hong Kong khaw champion Ken Rosewall hnu lama mipa bik zinga tour-level title la thei upaber a ni nghal bawk.
World number 52-na ni mek Monfils hian kum 2005 khan a title hmasaber hlawhchhuakin, nimin khan Melbourne lamah Australian Open bul a tan a, a chipui kum 21 mi lek ni chunga rising star ni chho mek Giovanni Mpetshi Perricard nen an intum.
Keys kutah
Adelaide title
USA nula Madison Keys chuan Inrinni khan Adelaide International final-ah 6-3 4-6 6-1-a a chipui Jessica Pegula hnehin women’s singles title a chang a, kum 2022 nen Adelaide khawpuiah a tum hnihna atan trophy a chawi.
All-American final-ah hian top seed Pegula hi rinkai zawk ni mah se ke hliam nei chungin Keys chuan a career-a a WTA title pakuana a hlawhchhuak.
World number 20 Keys hi set hnihnaah ke na avangin a talbuai a, off-court medical timeout koin enkawlna a dawng a, deciding set-ah a dingchang zui ta a ni.
US Open runner-up Pegula tan tun kha khup hliam avanga nikum November thla WTA Finals a khelh theih loh hnua tournament a hmachhawn vawikhatna niin, kumina a tournament khelh vawikhatnaah a chak zo lo a; nizan lam khan seeded seventh ni chungin Australian Open first round-ah Australian wildcard Maya Joint hmachhawn tur a ni a, Keys leh a chipui Ann Li.
-te inkhel nen an result tarlan hman a ni lo.
Adelaide men’s singles final-ah Felix Auger-Aliassime chuan American Sebastian Korda laka 6-3 3-6 6-1 hnehna changin a career-a ATP Tour title parukna a sualchhuak ve bawk.
Canadian Auger-Aliassime tan tun kha kum 2023 hnu lama a title lak leh hmasaber a ni nghal.