Kangmei vanga rilru hah Osaka

Kangmei vanga rilru hah Osaka
An khaw hmuntin hmuntang meipuiin a hliau alh zuai zuai laiin Thawhtanni khan Japanese Naomi Osaka chuan vawihnih a champion tawhna Australian Open-ah rilru pangkhing zetin bul a tan a, nikum Melbourne Park-a a ngam loh Caroline Garcia laka 6-3, 3-6, 6-3 hnehna nena phuba a lak zawhah rilru hah tak chunga first round a khelh thu leh ramkangah a fanu birth certificate hmunhima a dah dan inkhelh banah a sawichhuak.
Kum 2019 and 2021-a Australian Open title lo hlawhchhuak ve tawh Osaka hi Japan-ah piang mah se a naupan lai atangin Los Angeles lamah an inbengbel a; fanu a hrin hnuah tennis atangin a chawl vang vang a, nikum atang khan khelmualah kirin, tunah hian major title dang beiseiin Australia ramah hun a hmang leh mek a ni.
Kum 27 mi chuan French player nena an inkhelh boruaka chen tak tak harsa a tih thu leh an khaw lam a ngaihtuah reng thu sawi chungin LA lama an harsatna tawh mek chu tournament a hmachhawn meka fuihtu a ni tel tih a sawi.
Osaka hian a fanu thla 18-a upa birth certificate humhim tura a beih dan tarlangin, “Kangmei kal zel dan (fire map) ka thlir reng a, kan in thlen hmain block thumin la dang mah se kan tlanchhuahsan in chu a him ngei dawn em tumah kan chiang lo a, chuvangin, kan ina lut turin mi ka tir a, chu chuan ka fanu birth certificate min laksak a, hmunhimah min lo dahsawnsak a ni,
“Ka tan thil a hautak hle mai a, a chhan pawh ka fanu nena hriatreng tawh tur thil tamtak kan hnutchhiahna in chu in naran a ni lo,” tiin an chenna in dinhmun tur chiang lo ruai chuan a rilru a lapeng lo thei lo tih a sawi a, chutih rualin a chhungte an him tih hriatna chuan a awm a tinuam tih a tarlang tel.