Maha Kumbh-ah puan in 15 kang chhia

Maha Kumbh-ah puan in 15 kang chhia
Hindu sakhaw punkhawmna lian, Maha Kumbh Mela hman mekna hmunah Ningani khan kangmei a chhuak a, puan in 15 vel a kang chhia a, thi leh hliam erawh an awm lo.
Kangmei chhuak hi Sector 22 pawn, Chamanganj Chowki-ah a ni tih thuneitute an sawi.
Chief Fire Officer (Kumbh) Pramod Sharma chuan kangmei a chhuah thu hi chawhnuah an hria a, rang takin thelh mih nghal a ni tih an sawi.
Kawngpui a khah hneh em avangin kang thelhtute tan rang taka thlen a harsa deuh tih a sawi bawk.
Thleng har deuh mah se kangmei hi thelh mih thuai a ni a, nunna chân leh hliam tuar pawh an awm lo niin Sharma chuan a sawi bawk.
Sharma chuan SDM-in an sawi dan chuan puan in kang chhe tate hi thuneitute hriatpuina lova zar a ni tih a sawi a. “Puan in 15 a kang chhia a, a kan chhan hi chhui mek a ni,” a ti.
Hetih lai hian Maha Kumbh hmannaah hian innek buaina tenau a thleng leh a, naupang telin mi pasarih an thi niin Kalpvasi Police Station Circle Officer Rudra Kumar Singh chuan Zirtawpni khan a sawi.
Nilaini zinga innek buaina a thlen hnu lawk, zan lamah a hmaa a thlenna atanga km thum vel leka hla, Jhusi-ah pungkhawm innek buaina hi a chhuak a. “Mi pasarih thiin hmuh an ni,” tiin circle officer chuan a sawi.
Maha Kumbh-ah hian pungkhawm an tam thin avang leh Nilaini tuka innek buaina chhuak avang hian venhimna, lirthei tlan dan leh inkaihhruaina pawh tihdanglama khauh zawka kalpui thar mek a ni.