Ruling VC-in hmasawnna huilut ang – Christina Roluahpuii

Ruling VC-in hmasawnna huilut ang
– Christina Roluahpuii
Sawrkar laipui atanga village council tana fund lokal ringawt chuan khawtlang hmasawnna rotling siam a har a, state sawrkar atanga hmasawnna sum huilut thei tur VC siam a ngai tih AMC corporator Christina Roluahpuii chuan a sawi.
ZPM Thalai Hqrs buatsaiha Mamit district khaw hrang hranga party tana campaign-naah AMC-a ZPM corporator Christina Roluahpuii chuan, Finance Commission-a rural local body-te tana fund awmsa, VC Fund kan tih hmang ringawt chuan khawtlang tana hmasawnna rotling siam a harsa a; state sawrkar atanga hmasawnna hna thawhna tur sum huilut a, sawrkar lai minister-te nena thawk ho thei tur ZPM VC siam a pawimawh tih a sawi. Mamit Assembly constituency chu opposition MLA bial ni mah se, ruling VC an siam chuan khawtlang tana hmasawnna rotling zawk state sawrkar atangin an huilut thei dawn tih a sawi a ni.
ZPM Gen. Hqrs adviser, MAMCO chairman Isaac Malsawma chuan, opposition party-ten ZPM Val Upate awmna an zawt thin a, Val Upate hian hnai takah an uap reng a, minister-te chu corruption leh thildangah hmai bal an la awm loa, Val Upa mit tikham hi an la awm lo tih a sawi. “Opposition-te hian min la hek fu hleithei loa, opposition role an play dan la zir viau a ngai a ni. Politics hi ram leh khawtlang tana kan rawngbawlna tur a ni a, kan VC candidate thlangtling a, ram leh hnam tan rawngbawl ho turin mipui ka sawm a ni,” a ti.
ZPM Thalai Hqrs vice president Zoramchhana Sailo pawhin veng chhung roreltu an thlang dawn a; mipui mamawh chu khawtlang hmasawnna hna thawk thei tur a ni, tiin, “Lal atan kan thlang dawn loa, hnathawh kawr ha a, khawtlang aiawhtu nu leh pa chan changa kan ai awhtu tur kan thlang dawn a ni. Dikna leh rinawmna nen khawtlang rawngbawl turin ZPM VC thlangtling vek turin mipui ka sawm a ni,” a ti.