Mipa naupang belh chakin record siam

Mipa naupang belh chakin record siam
Mipa naupang, kum 14 mi chauh a la ni a, mahse, a thluak a tha a, belh leh paih tih velah calculator ang maia chak a nih avangin ‘human calculator’ an ti hial a, mental math lamah chuan duai lo tak niin, ni khat thil thuah Guinness World Records paruk a siam.
A hming chu Aryan Shukla a ni a, India mipa naupang niin, kum hmasa lamah rilru chauh hmanga 50 five-digit number (number digit nga hlit 50) belh rang record a lo siam tawh a, second 25.19 chungin a belh chhuak hman. Tun tumah hian Dubai-ah a thiam thil entir turin Guinness World Records-in an sawm leh a, record thar paruk a siam ta a ni.
Sukla hian hmanraw dang engmah hmang lovin, a rilru ringawta belhin number digit li hlir 100 chu second 30.9 chhunga belh chhuakin record a siam a, hei bakah hian number digit li hlir 200 chu minute 1 leh second 9.68 chhunga belh chhuakin record a siam a, number digit nga hli 50 chu second 18.71 chhunga belh chhuakin, number digit 20 chu number digit 10 hmanga sem (divide) rang ber record siamin, minute 5 leh second 42 chhungin a tizo hman a, number digit nga hlir pahnih chu second 51.69 chhunga puntir (multiply) hmanin record a siam a, number digit riat hlir pahnih chu minute 2 le second 35.41 chhunga puntir chhuakin record a siam bawk.
Shukla hi Guinness World Records pawhin ‘Human Calculator’ tih hminglem an phuah sak hial khawpa mental math lama chak a ni a, hetianga belh leh paih lama rilru tichak tur ian nikum darkar 5-6 vel math a practice thin niin a sawi.
Shukla pa chuan hetiang taka an fapain thluak a nei chak mai chu tunge a chhun tih an ngaihhruat tur pawh an chhungkuaah an awm lo niin a sawi a, “Chhungkaw pangngai kan ni ve mai a. Aaryan hi mipa naupang tluklehdingawn zinga hetiang pakhat awm ve hi a ni mai. Kan chhungkua hi mental calculator han tih tur chi kan ni lo,” a ti.