State Day leh hmasawnna…

India Independent 1947 atanga 1954 chhung Lushai Hills; 1954 atanga 1972 chhung Mizo Distict Council; 1972 atanga1987 chhung UT; 1987 atanga tun kum 2025 thleng Statehood.
Kum 38 zet State kan ni ve ta. He kum 38 chhung hian MNF leh Congress kaihhruai sawrkarin Mizoram hi term li(4) ve ve an enkawl a, 2023 atangin party thar ZPM-in tunah hian a enkawl ve leh mek a, Mizoram Legislative Assembly 9-na kan hmang mek.
He kum 38 chhung hian Mizoram chuan kawng hrang hrangin hma a sawn a, hma a sawn dan hrang hrang hi sawi tur tam tak a awm ang a; hma kan sawn theih miah lohna pawh sawi tur tam tak a awm bawk ang. Vawiin hi State Day te a ni bawk a, kum 38 chhunga Mizoramin hmasawnna a lo neih tawhte han sawi chhuah pawh thil chakawm tak ni mah se, hmunin a daih dawn loh avangin, hma kan sawn theih lohna lam hi inenfiah nan leh tan kan lak sauh sauh a tulzia hriat thar leh nan pahnih khat han tarlang ila.
Pakhatnaah chuan ei leh bara intodelh chungchang. State kan nih hnua sawrkarna inchelh chhawk zak zak thin MNF leh Congress te khan, sawrkarna an siam chuan Mizoram hi ‘ei leh barah kan intodelh ang’ tih chu election campaign au hla lian ber a ni deuh zel a. Eng eng emaw policy/flagship programme te pawh an duangin an kalpui ve ngei mai; mahse, kan dinhmun chu tun hi a la ni. Tuna sawrkarna chelh mektu pawh hian ei leh bara intodelh lam hawi bawkin hma an la chho leh ngei mai a, tunhmaa sawrkarna lo chelh thin ten an la tih theih loh, ‘kuthnathawktute tharchhuah leisak’ chu an auhla (slogan) lian ber a ni a. Hma an la tan chauh a la ni bawk a, comment han siam hluaina tur a la awm lo. Beiseina nen mipuiin kan thlir leh mek.
Pahnihnaah chuan, kan thanmawhbawk corruption a kiang thei lo. Nikumah sual thupha chawi tawngtai rualna neih a lo ni tawh a. Hei, tunah pawh State Day lawmnaah ‘I ram lo thleng rawh se’ tih thupui nen tawngtai beihpui thlak ngaiin kan la awm. ‘Corruption a kiam zel avanga lawmthu sawina’ te hi chu kan la hlat deuh a nih hmel.
Corruption hi a zung nena phoro vek tum pawh an awm tawh, corruption hian zung a lo kaih thuk hle tawh a ni. Tuna sawrkar mek hian eirukna hi a zung nen kar phawng thei tak maw.