Punjab-ah travel agent 40 licence tihtawpsak

Punjab-ah travel agent 40 licence tihtawpsak
Tun hnaia US-in an rama dan lova Indian awm a thawn haw zingah Punjab mi an tam viau hnuah state sorkar chuan beihpui thlakin travel agent 40-te licence a tihtawpsak a. IELTS center thenkhat license pawh titawpin dan lova hetiang kalpui chu hetianga tih zel hi an tum.
Amritsar police chuan an khawpuia travel agent thenkhat laka complaint an dawn bawhzuiin hetiang hian an che chhuak a, an beih zui zel pawh a rinawm.
Police hian dan lova ram danga Indian thawntu travel agent-te lakah thubuai an ziak lut mek zel a, a titute man tumin an zawng zui zel bawk.
Hemi tura thu thehluttu hi Sarabjit Singh niin Deputy Commissioner Sakshi Sahni hnenah a thehlut.
Sorkar chuan US atanga thawn haw zingah Punjab mi an tam ber tih an lo sawi tawh a. February 5, February 15 leh February 16-a India-a luhpui Indian 333 zinga a tam ber, 126 (37.8%) chu Punjab mi an ni.
A hma khan Punjab Chief Minister Bhagwant Mann-a chuan US atanga thawn hawte an state-a tumtir chu a duh loh thu a lo sawi tawh bawk a. Hetih lai hian May, 2020 atanga thawn haw thlawhna 21, Amritsar-a tumpui zingah Punjabi an tam ber nia sawi a ni.
Punjab atanga ram dang changkang zawka kal tam ber hi nun nuam zawk beisei leh sum tam zawk hlawh theih inbeisei an ni thin a; mahse, visa lem hmantir an ni fo thin.
Kum thum liam ta chhung khan Punjab-ah hian travel agent lakah police-in thubuai 3,200 chuang an ziak lut tawh.
Heng thubuaiah hian man pawh an awm nual tawh a, an zingah hian Punjabi zaithiam, Fatehjit Singh pawh a tel a, nikum September khan man a ni.
Punjab atanga ram danga chhuakte hian US, Canada, UK leh Australia an pan tam ber.