US-in Russia be turin Moscow pan

US-in Russia be turin Moscow pan
US thuneitute chuan Ukraine-a inkahhai kalpui dan tur sawipui turin Russia an pan niin President Donald Trump chuan a sawi.
A hmain Saudi Arabia-ah American thuneitute hi Ukrainian hruaitute nen indawrin ni 30 chhug inkahhai rawtna chu an pawm.
Secretary of State Marco Rubio-a chuan a hmain ‘tunah chuan Russia thutluknaah a innghat ta’ a ti a, US chuan inbiakna hmang chauhvin indo hi tihtawp theih a nih a ring tih a sawi.
American-in an tlawh mek lai hian Kremlin chuan President Vladimir Putin-a chuan Russia-a Kursk region a tlawh ve mek a, heng lai hmun thenkhat hi nikum atang khan Ukraine-in an thunun.
Jeddah-a Thawhlehnia an inbiak hnuah Ukrainian President Volodomyr Zelensky-a chuan tunah chuan US-in Russia a hmin theih danah a innghat tih a sawi ve bawk.
Kremlin chuan inkahhai ruhmanna chu an zir chiang mek a, Trump leh President Putin-a pawh phone-a an inbiak tur thu a sawi.
Trump-a hian Moscow pana zin an hotute a sawi chiang lo va. Hetih lai hian Press Secretary Karoline Leavitt chuan National Security Secretary Mike Waltz chu Russian be turin a kal tih chu White House-ah a sawi.
Kar tir lamah khan Middle East envoy Steve Witkoff pawh Jeddah-a an inbiak hnuah Moscow dawr turin a kal zui dawn tih sawi a ni bawk.
Kremlin thupuangtu, Dmitry Peskov-a chuan inkahhai rawtna chu kil hrang hrang atanga thlirin an zir chiang dawn tih a sawi.
Jeddah-a US leh Ukrainian thuneitute inbiak kha February 28-a Zelensky, Trump leh Vice-President JD Vance te an inbakkaih hnua indawrna hmasa ber niin US chuan sipai leh thuruk hrilha a puihna pawh a titawp zui nghal bawk.