Champions League hnuhma thar

Thawhlehni leh nilai zan khan UEFA Champions League (UCL) last 16 second leg khelh a ni a. Inkhel hmuhnawm leh han sawi zui hat tur a awm nual. UCL Last 16 second leg-a hnuhma langsar zual kan hrut kual leh thuak thuak ang.
Harry Kane
Thawhleh zan khan Bayern Munich in 2-0 in Bayer Leverkusen an hneh. He inkhelah hian Bayern Munich tan Harry Kane chuan goal khat a thun. England forward Kane hian UCL-ah goal 39 thunin assist vawi 11 a nei bawk a, goal 50-ah a inrawlh tling chiah. Kane hi English player zingah UCL-a goal 50-a inrawlh tling pahnihna a ni a, David Beckham (16 goals, 36 assists) nen an record a intluk. Kane hi English player zingah Champions League season khatah goal 10 thun tling thei hmasa ber a ni tel bawk.
Lamine Yamal & Raphinha
Thawhleh zan khan FC Barcelona chuan an mikhual Benfica chu 3-1 in an hneh. He inkhelah hian Barcelona rawlthar Lamine Yamal chuan goal khat a thun a, assist a nei bawk. Kum 17 leh ni 241-a upa Yamal hi champions league match khata goal thun leh assist nei kawl thei naupang ber a ni a, record duhawm a siam belh leh.
Season kal mekah Barcelona tan Raphinha a chetha viau a, UCL-ah goal contribution vawi 16 zet a nei tawh a. Lionel Messi hnu lamah Raphinha hi UCL season khata goal-a inrawlh tam ber a ni a. Messi hian kum 2011-12 khan goal contribution hi vawi 19 a nei tling.
Real Madrid
Nilai zan khan champion lai Real Madrid chuan penalty shoot-out ah an elpui lian Atletico Madrid an hneh. Real Madrid hian European Cup/UEFA Champions League-a penalty shoot-out ah vawi li hnehna an chang tawh a. Penalty shoot out a chak tam ber an ni.
Gallagher
Real Madrid nen an inkhelh tumin English player Conor Gallagher chuan Atletico Madrid lakah goal a thun a, Gallagher hi English player zingah Madrid derby (Atletico and Real Madrid) a goal thun hmasa ber a ni. Gallagher hian Real Madrid lakah hian inkhel tan atanga second 27-naah hmahruaina goal a thun a. English player zingah champions league-a goal thun rang ber a ni tel bawk.
Arsenal : Arsenal chuan nilai zan khan 7-1 a an hneh tawh PSV Eindhoven chu 2-2 in an inhnehtawk pui a, PSV lakah hian goal 9 ngawt an thun. Gunners hi English club zingah UEFA Champions League knockout stage-ah goal 9 chin thun tling thei pahnihna an ni a. 2018-19 khan Manchester City chuan Schalke lakah goal 10 ngawt an lo thun tawh a ni.
Arsenal winger Raheen Sterling chu champions league-a goal 45-ah a inrawlh tling ta chiah a. English player zingah UCL goal-a inrawlh tling palina a ni a, a chungah hian David Beckham (52), Harry Kane (50) leh Wayne Rooney (47) te an awm.
Dembele : Paris St-Germain player pawimawh Ousmane Dembele chuan kum 2025 chhung bika inelna hrang hrangah goal 21 a thun tling tawh a. Europe’s top 5 leagues player bikah kum 2025 chhunga goal thun hnem ber a ni.
Alisson Becker : Last 16 first leg leh second leg-a PSG nen an inhmachhawn tumin Liverpool si nghak Alisson Becker chuan save vawi 16 zet a nei a. UCL knockout stage-ah bik save nei ngah ber Bayern Munich si nghak Manuel Neuer record a nih rual.
PSG : Thawhleh zanah Anfield a lenglut Paris St-Germain hian shot vawi 21 ngawt an nei a. Anfield-a lenglut team zingah shot nei ngah ber Chelsea (April 2009) record an nihrual.
Guirassy : Serhou Guirassy chu UEFA Champions League season kal meka goal 14-ah a inrawlh (10 goals, 4 assists) tling tawh a. African player zingah Mohamed Salah nen UCL season khata goal-a inrawlh tam zual an ni dun.