Oman ram palai anga inchhal man chhuak

Oman ram palai anga inchhal man chhuak
Oman ram palai anga inchhala a chet velnaa dan anga police ven leh buaipui tura titu chu police-in hre chhuakin Uttar Pradesh-ah an man.
UP Gate, Ghaziabad-a an mannaah hian a Mercedes car dum, identity card pakhat leh visiting card 46 awl an man telsak bawk.
Lemchang hi kum 66 mi, Krishna Shekhar Rana-a niin Delhi-a Amar Colony-a cheng a ni.
Ram palai anga lem a chan avang hian Bharatiya Nyaya Sanhita (BNS) section hrang hrang tlawhchhanin thubuai siamsak a ni tih Trans Hindon Deputy Commissioner of Police (DCP) Nimish Patil chuan a sawi.
DCP Patil-a chuan Rana-a hi Agra-ah Zoology professor a nih thu leh Agra-ah hian Krishna College of Science & Technology a nei a, Rajasthan-ah resort a nei bawk tih a sawi.
A hna atanga a chawl hnuah union environment ministry-ah kum 2015 leh 2018 inkar khan Appraisal Authority a ni a, a hna chu hma lakna tur awma khuarel khawih chhe lo a ni tih finfiahna petu a ni a. Police hian environment ministry-ah hian a chungchang an zawh chianna an la dawng lo.
Police officer chuan thu an zawh fiah tawh chinah an mi man hi university paliah vice chancellor angin a chhal bawk tih a sawi.
“High Commissioner of Oman nia inchhal, KS Rana chu man a ni a. Thu zawh fiahna atangin NGO pakhat, India GCC Trade Council-a thawk a ni a. Trade commissioner a ni a; mahse, high commissioner angin a awm a ni,” tiin Patil-a chuan a sawi.
Officer hian an hnena police-in a laka ti tura a phut a thehluha lehkha a thil telah rinhlelhawm an hmuh atangin an um zui ta tih a sawi.
Lehkha hi Ghaziabad Police hnenah a thawn a, a dil angin police venna leh a tul ang pek a ni a. A hnuah a lehkha chu a rinhlelhawm tih hmuh chhuah a ni ta a, thu zawh fiah zui niin trade commissioner a nih thu leh high commissioner a nih thu a inpuang ta niin a sawi.