CBI chhui phalna case pathum pe tawh – Chief minister

ZPM sawrkar hnu ah Central Bureau of Investigation-in Mizorama case rawn chhui phalna a dil pathum chu a remtih sak tawh tih chief minister Lalduhoma chuan a sawi. Assembly Session neih zawh takah Vigilance changtu chief minister chuan, sawrkar hmasaah khan Lokayukta-in case pahnih chu CBI hnenah a pe a. CBI hian Mizoram sawrkar hnenah chhui phalna an dil a, a pahnihin an lo hnawlsak nia sawiin, ZPM sawrkarah mi pathum chhui phalna an rawn dil a, an pe tawh tih a sawi a ni.
“CBI consent hi sawrkar hmasa lamten an pe duh loa, keini chuan mipui hnenah intiamin kan pe ang, kan ti a. 2023 kumtawpa sawrkarna kan chelh khan, December thla la la hian consent kan pe nghal. Hemi hnu ah India sawrkarin criminal law pathum a tichhuak thar a, hemi hnuaiah hian consent pek nawn leh a ngai a, kan pe nawn leh. Pek dan tur pawh hi duh duha ziah a thiang loa, form awm sa dah khah a ni,” tiin, consent pe duh lo leh pek tawh hnukkir leh anga sawi chu a dik lo tih a sawi.
Chutihrualin ‘consent’ pekah Mizorama sawrkar laipui hnuaia thawkten thubuai an neih chuan, chumi kaihhnawiha lo inhnamhnawih tualchhung mi a huap a. State sawrkar hnuai ami chu a huap thiang lo, huap tir pawh tum se, thuneihna an nei lo tih a sawi.
Statutory body reng rengah sawrkar dinglaiin an duh duhin a hotu emaw member emaw an dah ngai loa, leader of opposition/ oppostion group leader an rawn thin a ni. Pu Lal Thanhawla chief minister a nih lai khan a rawn ziah a, Pu Zoramthanga pawhin thil dangah chuan a rawn a, Lokayukta bikah erawh a rawn miah lo tih Lalduhoma hian a sawi.
“An (MNF) term tawp dawn tepah member pakhat an ruat thar a, chairman pawh kumthar March-a a hun tawp tur kha a hma kum October velah an buaipui a, chairman tura an ruat hi khatihlai sawrkara adviser to chief minister niin, party-ah pawh nihna pawimawh tak chelh lai a ni. Lokayukta hi chu mi neutral awmna tura ngaih a ni a, party pakhata pawimawhna tak nei dah hi Lokayukta member pakhatin a pawm thei loa, a tlang ta lo a ni,” a ti.
A tlang tak loh avang hian ZPM sawrkarin chairman tur a ngaihtuah a ngai a, chairman bakah member pakhat lak belh an tum a, chairman lakna leh member laknaah hian opposition leader chu vawikhatmah an koh hmaih ve ngai lo tih chief minister hian a sawi.
Lokayukta Mizoramah hian corruption case 74 ziahluh a ni tawh a, enquiry lak zawh tawh 46, pending 14, full investigation atana refer 26, convict 4 an awm tawh tih a sawi a ni.
Lokayukta building hi MINECO ah ruahman niin, sum pawh dah a ni tawh a, investigating staff leh prosecuting agency a hranga neih an duh thu an thlen erawh sum harsatna vangin an la pe thei rih lo tih a sawi bawk.