India leh Pakistan chuan Jammu & Kashmir-a Poonch district-ah ‘Brigade Commander level flag meeting’ neiin ramri chungchang leh Line of Control (LoC) boruak tang tak bengdaih dan tur hrang hrang an sawi.
LoC hrula Chakkan Da Bagh meeting point-a inbiak hi kumina a vawi hnihna a ni a. Tun hnaiah ramriah hian inkahna a awm zeuh zeuh va, Indian lamah IED pawh a puak tawh bawk.
Army PRO Lt Colonel Suneel Bartwal chuan flag meeting chu ramri enkawl dana tih dan thin pangngai a nih thu a sawi a, Indian lam aiawh hian tun hnaia ramri kân tumna tam ta, inkahhai bawhchhiatna thleng leh IED puak chungchang te an sawi.
February 21-a an thutkhawm hmasakah khan LoC boruak tihdaih tha an ti a, February 25, 2021-a ram pahnihten inkahhai inremna an siam chu vawn nun zel tha an ti bawk.
Hetih lai hian Pakistani Army hian April 1-a Poonch district-a LoC hrula rahpuah bomb a puah hnuah inkahhai hi an bawhchhia a. Hemi chungchanga Indian Army-in thu an chhuahah chuan rahpuah bomb hi Pakistan Army-in LoC hrula an dah niin an tar lang.
Sipai thuchhuah hian Indian sipaite chu hemi hnuah phei chuan ramri thununa thil a pangngai leh theih nan leh silai hmeh puah a awm loh nan nasa takin tan an la tih an sawi.
A hma chawlhkar hnih liam, March 12-ah pawh Rajouri-a LoC hrulah tho Indian sipai pakhat kah hlum a ni bawk a. Sipai hi Kalsian, Nowshera-a ramri-a duty-a dah a ni.
Hemi ni vek hian LoC hrulah bomb a puak bawk a; mahse, thi leh hliam an awm lo.
February 11 khan captain telin Indian sipai pahnih chu LoC hrul, Akhnoor-a IED puakah an thi a, hei hi helho kam nia hriat a ni a. Heng thil thlen hma pawh hian Rajouri leh Poonch district-a LoC hrula Indian sipaite chu ral atanga sai an ni fo bawk.
Ramri thilah India leh Pakistan sipai inbia
Get real time updates directly on you device, subscribe now.
Next Post