Sawhthing quintal 70000 chuang lei tawh

February ni 20 atangin Mizoram sorkarin sawhthing a lei a, April ni 20 thlenga lei tawh zat chu quintal 72,003 a ni.
Mizoram Agricultural Marketing Board (MAMB) chhinchhiah danin, April ni 20 thlengin mi 7,689 te hnen atangin sawhthing hi quintal 72,003 an lei tawh a, a tam ber chu Khawzawl DAMC huam chhunga mi niin, mi 1436 hnen atangin quintal 15,926 an lei tawh.
Sawhthing lei hna hi March ni 20-ah an chawl a, an sawi danin, tam thama lei an chawl a, mahse hemi hnu pawh hian tam tham vak lova lei a awm reng tho. April ni 21-ah an tan leh a, an lei tur zat hriat a ni rih lo.
MAMB hotute hnen atanga thu dawn danin, lei hun chhung tur bituk a awm rih lo a, lei tur zat pawh bituk a ni rih lo. Secodnary Collection Centre hrang hrangin an dinhmun azirin, an dahna hmuna a tam dan azirtein mahni remchan dan angin an lei ang an ti.
Sawhthing lei sa hi hralh leh a ni a, April ni 20 thlengin la hralh loh hi quintal 1800 vel a awm tih thu dawn a ni.
MAMB hnen atanga sawhthing leitute hi hnam dang an ni a, an leina man (rate) a inang lo. A tir lamah khan kg-ah Rs 20 velin an lei tlangpui a, Rs 18 leh Rs 19-a lei te leh Rs 24-a leite pawh an awm. Tun hnaiah a man hi a tlahniam a, kg-ah Rs 15 te’n MAMB hnen atang hian an lei; Rs 18 leh Rs 19-a leite pawh an awm a, Rs 20 a kai lo tih thu dawn a ni.