Hri darh zau vak rih lo

African Swine Fever (ASF) a leng mek a, mahse he hri hi a darh zau vak rih lo. Vawk thi chu ni tin a awm a, vanneihthlak takin hrilenna hmun a pung vak rih lo.
Mizoram district pali- Mamit, Lawngtlai, Siaha leh Lunglei district-ahte kuminah ASF hi finfiah a ni tawh a, district dang a thlen rih loh bakah, finfiah tawhna khua leh veng pawh a pung vak rih lo.
AH&Vety department hotute chuan inkhuahkhirh that chuan ASF hi a darhzau vak lo thei a, a darh muang thei bawk an ti a, tuna a lan danah pawh hian he hri vei vawk lak sawn loh vang te, vawk khawihtute an fimkhur vangtein hri hi district hrang hrangah a darh chum chum lo tihna a ni thei tih an sawi.
Tunah rih chuan Siaha leh Lawngtlai district te’n an tuar nasa a, Siaha district-ah hian vawk 1435 a thih tawh bakah vawk 527 tihhlum a ni tawh. Khaw 26-ah hri hi finfiah a ni tawh. Lawngtlai district-ah vawk 1044 a thi tawh a, vawk 298 tihhlum ni tawhin, khaw 13-ah ASF hi finfiah a ni tawh.
Hun engemaw chen a reh hnuah March thla chawhnu lamah he hri hi a leng leh a, AH&Vety department-in an chhinchhiah danin April ni 21 thlenga ASF vanga vawk thi zat chu 2663 niin, 881 tihhlum a ni tawh. District pali-a khaw 44-ah ASF hi finfiah a ni tawh.
Department hotute chuan hri hi a darhzau rih lo a, finfiah tawhna khua, a bikin Siaha leh Lawngtlai district-a miteah hian an tuar nasa thung an ti.