EPL ah Liverpool an champion

Pathianni zan khan champion tura point khat mamawh Liverpool in an mikhual Tottenham Hotspurs chu 5-1 ngawtin an sawp. Tottenham sawptu Liverpool hi EPL champion thar an ni a, Manchester United champion zat nihrual in, English club ropui ber an nihna an nemnghet leh zual.
Anfield a mipui sing ruk chuang ngawt pungkhawm, sen vul chuk karah 16-naa awm mek Tottenham Hostpurs in bul an tan tha viau a, minute 12-na lekah Dominic Solanke chuan corner atanga ball kal chuh fuh zetin a tauh goal a, hmahruaina goal a thun nghal. Team talbuai Tottenham hi hma takah goal an thun vangin an phur a, Anfield-ah hnehna changin Liverpool champion hun tihkhawtlai ngei tumin tan an khawh. Mah se, Tottenham in goal an thun hmasa hi inkhel tihmuhnawm zualtu a ni a, Solanke goal hian Sapui muthlu a kaiharh ta lek zawk.
Kum 35 chhung zet EPL-a an champion lawm hun nghak mipui sen vul chukte chuan an player te fuih phur turin aw ring tak an chhuah a, mikhual team tan buai loh theih a ni lo. Reds hian goal thun ngei tumin tan an khawh zui nghal a, goal pawh an thun thuai. Mawi taka an khingpui tlarhnung an thiah hnuin Szoboszlai siamsak tha tak chu Luis Diaz chuan awlsam takin a pet goal a, minute 16-naah an si phurh a sut. An si phurh an sut vangin Liverpool an phur a, goal pawh an thun belh leh thuai. Minute 24-na lekah midfielder chetha tak Alexis Mac Allister chuan pui zetin a pet goal a, hma an hruai letna goal a thun.
2-1 a hma an hruai vawngin Anfield-ah lawmna tuipui a fawn a, Anfield hi hlim thawm vangin a khur a ni ber mai. Inkhel a rei telh telh a Reds an chetha tulh tulh. Minute 34-naah Gody Gakpo chuan chep tak karah fing zetin a pet goal zui leh a, 3-1 a hmahruai chungin chawlhlawk an hmang.
Chawlhlawk hnu lamah Liverpool an khel tha chhunzawm a, goal hnih an thun belh leh. Minute 63-naah Mohamed Salah chuan Liverpool goal lina a thun a, minute 69-naah Tottenham defender Destiny Udogie chuan an lamah ti-goal in Liverpool goal ngana a thunsak zui leh a. 5-1 ngawta hma an hruai tawh vangin Liverpool hian champion tura an mamawh zawng zawng an nei kim tawh a, an mualah ngei nuamti takin an inkhel chhunzawm. Goal dang luh belh lovin inkhel a tawp a, Liverpool chu EPL champion thar an ni ta a ni.
Liverpool hi English top flight ah vawi 20 champion in, champion ngun ber ni thin Manchester United record an nihrual. English top flight a champion ngun ber an nih bakah English team zingah Europe a hnuhma nei tha ber an ni bawk a, English club ropui ber an nihna an tifiah leh zual. Reds hi EPL-a an champion hnuhnung ber chu 2019–20 season kha a ni a. Hetihlai hian Covid 19 hripuiin khawvel a tihbuai vangin Liverpool tantuten an mualah champion an lawm thei lo. An mualah ngei EPL champion an lawm hnuhnung ber chu 1989–90 daih tawh kha a ni a. Kum 35 zet an nghah hnuin an nghakchhuak ta a, Anfield-ah ngei an hla ropui ‘You’ll never Walk alone’ sa rual dual dual chungin champion an lawm thei ta nge nge.
ELP champion thar ni turin Liverpool hian khelh 34 atangin point 82 an hmu a, khelh hmabak pali la nei chungin umphak theih an ni tawh lo. Khelh 34 atang hian vawi 25 hnehna an chang a, draw vawi sarih an neih bakah tlawm zawkah vawi hnih an tang ve bawk. A khingpuite lamah goal 80 an thun a, goal 32 an chhuah tawh thung. 2023-24 season tawp rualin Liverpool hi manager ropui Jurgen Klopp-an a chhuahsan a, Klopp hmunruak hi Dutch manager Arne Slot-a’n a luah. Slot hian EPL-a a season khatnaah Liverpool a champion pui nghal a, hnuhma ropui tak a hnutchhiah. Liverpool a champion pui nghal theih chhan hi manager chhuak ta Klopp-a’n sulhnu tha a hnutchhiah a, team tha tak a lo din sa vang a nih thu sawiin amah lo chawimawi a, Anfield-a titlangneltu Klopp a chawimawi let.
EPL-ah Liverpool an champion a, hun hlimawm tak an hman laiin Liverpool hmelma lian ber Manchester United chu AFC Bournemouth lakah an chak zo lova, 1-1 in an lo hnehtawk ve thung a. United hian 14-na an chhuahsan hleithei lo.