Hrem hmabak real defender Rudiger-a khup hliam an zai

Hrem hmabak real defender Rudiger-a khup hliam an zai
Inrinni Copa del Rey final-a Barcelona ngam loa Real Madrid an tlawm tum khan khelmual a chhuahsan hnua referee a vawm avanga hremna hmabak mek Real defender Antonio Rudiger chuan extra time minute 111-naah hliam avangin khelmual a chhuahsan a; a hliam dinhmun an endik hnuah a khup veilam na chu zai ngai a ni tih nemngheh niin, inzaina pindana nawrluh a nih hnuah hun engemawchen a chawlh rih a ngai dawn.
Germany international chawlh rei zawng tur hi Real thuchhuah chuan tarlang chiah lo mah se Spanish media-te tarlan danin chawlhkar ruk atanga chawlhkar riat vel a chawlh an ring a, chuti a nih chuan domestic season kal laiah a inlan hman tawh dawn lo a, June ni 15 atanga khelh tan tur Club World Cup-ah pawh hian a fit hman dawn em tih a la chiang lo.
June ni 4 leh ni 8 inkar chhung hian Germany pawhin Nations League finals khelh tur an nei dawn a, ram tan pawh Rudiger hi a inlan thei rih dawn lo a nih hmel.
Social media lama post a siamah Madrid tlarhnung vengtu Rudiger chuan tunhnai thla sarih chuang liamta chhung khan na nei reng chungin a inkhel tih a sawi a, Inrinni Copa del Rey final-ah khan inhliam lo pawh ni se zai chu pumpelh chi nia a ngaih loh thu a tarlang.
Inzaina chemte a hmachhawn zawha a dinhmun sawiin, “Tunah chuan nain min kiansan leh ta a, ka inzaina pawh a hlawhtling a, medical team lakah ka lawm takzet a ni.
“Ka hmaah hian tournament lian pahnih – Nations League leh Club World Cup awm mah se chawlhkar tina ka dinhmun leh hmasawnna thlir keuh keuh rih ka ngai dawn a, hmalama tournament pahnih hmachhawn thei tur hian ka theihtawp ka chhuah dawn a ni,” a ti.
Kum 32 mi Rudiger hi Barcelona laka an tlawm tum khan hliam avanga khelmual a chhuahsan hnuah referee a vawm avangin red card pek a ni zui ta reng reng a, referee a vawmna kha vur khal (ice cube) niin an sawi a, kha mi tuma a khawsak dan avang khan hun rei fu hremna a hmachhawn tho tho tura ngaih a ni.
Spanish Football Federation (RFEF) disciplinary code article 101-nain a tarlan danin, referee-te laka tharum thawhna tenau pawhin hremna nep lo tak a thlen thei a, ‘mild violence’ an tih chelektu chu match li atanga match 12 thleng hrem theih an ni a, Rudiger-a chunga hremna hi a na ber chi a ni dawn em tih hriat theih a la ni rih lo.
Referee laka a chet dan kha RFEF lamin serious zawka an ngai a nih phei chuan thla thum atanga kum khat thleng hremna a hmachhawn thei dawn.
Eng hmanrua emaw tak hmanga referee a vawm avang khan Rudiger chuan ngaihdam dil tawhin, a khawsak dan kha chhuanlam leh phatmar ngaihna awm lo tiin a sawi nghe nghe.
Final whistle ham hma lawka Kylian Mbappe laka ‘foul’ ham a nih chungchangah Rudiger leh bench lama thu tura an thlak ve bawk a team-mate pakhat Lucas Vazquez-te an thinrim fal hle a, Vazquez pawh hi a thinrimna a lantir ‘over’ hret avangin red card pek a ni ve tho bawk.
A hnuah a nungchang mawi loh avangin Real Madrid England midfielder kum 21 mi Jude Bellingham pawh hnawhchhuah a ni zui lehzel a ni!
Karliamta kartawp Copa del Rey final-a 3-2-a Barcelona chakna goal langsar ber kha minute 116-naa Jules Kounde tihluh a ni.