Kar tawp Pro Volleyball inkhel thlirlet ang
Anastasia Electric Vengin lei rem an rap thar leh a, an player thar Karthik Madhu-a hovin Inrinni zan EverHome Pro Volleyball League-ah set thum set khatin Khawbel an hneh.
LPS Arena, Falkland-a a inkhelh vawi khatnaah India captain hlui Karthik chuan point 35 hmuin 17 a hloh a, Laldinsanga, Laldensanga leh Helly Vanlalliana’n Electric Veng team tanpui bawkin 27-25, 25-20, 23-25, 25-22-in an chak.
Player naupang leh beiseiawm Dinsanga’n tum 20 vaw tlain vawi sarih a tisual a, Pro Volleyball a khelh tawha point a hmuh tam ber a ni. Densanga’n vawi thum, Helly-a’n tum nga tisualin point 10 ve ve an thawk chhuak a, chakpui thamin Anastasia Mizo player-ten an khel.
Kum ruk hnuah Pro Volleyball-ah Anastasia an kir leh a, Sihphir an hneh loh nghal avangin rin an hlawh zui lo. Mahse, an boruak hniam laiin Tuichangral an hneh a, ningani zan khan Thutak Nunpuitu Team lakah an tlawm zui leh a ni.
An khelh hmasak vawi thumah Gujarat atanga an lak luh Yougank Baliyan chuan point 58 hmuin 22 a hloh a, team hotuten an duh khawp lo deuh avangin Karnataka atangin kum 31 mi Karthik an lak belh. Indian blocker tha hian inrinniah Aizawl rawn thlengin zanah a khel nghal a, team a chawi kang.
Mizoram inelna sang bera an tel hmasak berah Khawbelin beiseiawm takin league bul an tan chho va, set hloh lova Hunthar leh Sihphir an hneh zawn hnuah an player tha Ashwal Rai chuan a khelh zawm thei lo. A aiawh tura an lak luh Tanish Choudhary-a hovin tum hnih an khelhna a ni a, an tlawm zawn.
Chutih laiin India Under 21 team tana khel tawh Tanish hian Anastasia hmaah point 38 hmuin 11 a hloh a, team chakpui zo lo mah se Kuriz Player of the Match lawman a dawng. Mizo player-ten Khawbel an pawt hniam a, mi mala che tha ber Lianlunsang Vaiphei chuan tum sarih vaw tlain point hnih a hloh a, Anastasia Mizo player-te an el zo lo.
Team paruk zinga hniam ber Huntharin point thum kawlin a dang zawngin point ruk theuh an hmu a, semifinal lut tur a la chiang lo hle. League khelh khat an la neihah Anastasia-in May 14-ah Hunthar an hmachhawn dawn a, a tuk zanah Khawbel leh TNT an innuai ang.
Anastasia hmaah Khawbelin knockout round lut hmasa ber nih tumin an khel a, Electric Veng team-in beiseina nei zui turin chak an mamawhna a sang ve thung. Set khatnaah an inum tawk hle a, Kathik chuan hnuhma nei nghalin a vuak tlak hnuah 23-20-in Anastasia an sang hman.
Mahse, Khawbelin nawr letin point thum an hmu zawn hnuah point khat hmuh belha set la thei turin 25-24-in an sang zui. Boruak sangah Karthik chuan vaw tlain Anastasia thinphu a tireh a, Dinsanga’n a hlap tlak ve leh hnuah Khawbel talbuai zelin R Lalmalsawma’n a nam sual a, point thum hmu zawnin Electric Veng team an tlang.
Set hnihnaah Karthik a langsar a, a vuak tlak bakah net chungah lehlam vuak dang turin hlawk takin ban a phar. A hnunga a awm lain Helly chuan lehlam hlap dang ve thungin Tanish tih loh Khawbel Mizo player-ten vuak tlak an harsat a, Lalruatfela Sailo leh Lalhruaizela an talbuai nasa zual.
Vuak sual nei tam ngai lo Densanga’n a ball hmuh awmze neiin a chhuah a, a vuak tlak rualin 16-11-in Anastasia an sang. Khawbelin an hnaih zo lo tluan a, Helly-a’n a vuak tlak hnuah 24-10-in Aizawl team-in hma an hruai a, Lalruatsanga’n chiang takin Ruatfela hlap dang tla ve lehin set an la zawn.
Set thum faia chak tlang thei mai turin set thumna tawp lam thlengin Anastasia an fal a, Dinsanga’n a vuak tlak rualin 22-17-in hma an hruai. A kawtawp atangin Khawbel an infuih phur a, Rodingpuia’n an inkar tizim hretin Dinsanga vuak bakah Karthik-a hlap tum hnih an dang tla zawn zui a, boruak a inthlak.
A kotlang atangin Yougank leh Anastasia player dangten thil thleng a thlir reng a, team siksawi lovin an hnungtawlh zel. Tanish chuan tum thum vaw tla zawnin 24-23-in Khawbelin hma an hruai let a, Dinsanga hlap dang tla zuiin an pawtthla.
Anastasia an talbuai rei lo va, set linaah insiam thar leh nghalin Karthik chuan a hui tlak hnuah 16-11-in an sang. Khawbel tan Tanish a tangkai a, an inkar tizim chho hret hretin 22-20-in an hnaih hman.
Mahse, Khawbelin lehlam vuak dan kawngah harsatna an tawk a, Mizo player-ten point an thawk chhuak thei mang lo bawk a, Tanish a rim hle.
Anastasia erawh tute pawhin point an hmu thei zel a, Densanga’n a hlap tlak hnuah Dinsanga’n vaw sual mah se Karthik chuan 24-22-in hma a hruaipui a, Rodinpuia vuak a dang tla zui leh a ni.
Sihphir def Thutak Nunpuitu Team (mipa)
= 25-22, 25-16, 25-21 (3-0)
Niyas Abdul Salam chuan vawi 41 vaw tlain Sihphirin hnehna hlu tak an chang a, karliamta Zirtawpni zan EverHome Pro Volleyball League-ah set thum faiin Thutak Nunpuitu Team an barakhaih.
LPS Arena, Falkland-ah Niyas chuan point 14 a hloh laiin legue kal meka mi mala point 40 leh a aia tam thawk chhuak hmasa ber a ni a, dan theih lohin a filawr a, 25-22, 25-16, 25-21-in Sihphir a chakpui.
Hunthar leh Anastasia Electric Veng an hneh zawn hnuah rin hlawh mah se, zan zawna an khelh avanga Sihphir talbuai tawhnaah TNT-in harsatna an tawk ve leh chiah a. Team pum pui tla hniam thar lehin May ni 16-ah league an khel zo dawn a, an hma lam hun tichiang turin Khawbel nen an intawng ang.
Sihphirin league bul an tannaah Anastasia hneh nghal mah se awl nei lovin zan zawna an khelh a ngai a, Khawbel lakah set la lova chiang taka an tlawm hnuah Hunthar an hneh lo zui leh a, an derthawng hman.
Ningani zanah Anastasia lakah tha takin TNT an inlan a, zirtawpni zan erawh Niyas leh Sihphir an ngam lo hle. Set thumna tirah 1-0 leh 3-2-in an sang ve zawk a, hei bak Sihphirin hma an hruai tluan zak a, hneh taka inkhel awpbet chungin semifinal luhna kawng an sat eng.
Sihphir tan Lalhmunmawia’n vawi ruk vaw tlain point li a hloh a, H Lalrinmawia’n point li a hmuh chanve paih bawkin Thangminlal Guite chuan hloh nei lo mah se tum hnih chiah a hlap tla bawk. Mi malin Niyas a chungnung a, a vawi hnih nan Kuriz Player of the Match lawman a dawng.
A tir atangin TNT an bet a, hahchawlhna hun thawl an neih loh vang nge an khel a nung lo va, vuak tlak an harsat bakah an thatna thin net chunga lehlam vuak dan kawngah pawh Niyas an dang hneh lo hle.
Vantanchhana’n tum 16 hlap tlain point ruk a hloh a, lehlam rinrawl a el zo lo. A hma zana Anastasia laka khel tha tak Zosangzuala’n point 10 a thawk chhuak tling lo va, K Zodingliana’n zan hmasa ang chiahin point khat hlohin point riat hmu a hmu ve thung a, awmze nei thamin Saidingpuia Sailo a inlan phak lo.
Sihphirin semifinal lut thei dinhmun luah lailawkin league inkhel hnuhnung ber May 17-ah Tuichangral an hmachhawn ang. Coach Lalchhuangliana chuan Pro Volleyball neih tawhah tun hi team hrang hrang inel tawk ber tum a ni dawn tih a lo sawi lawk tawh a, eng team mah vawi hnih aia tam chak zawn thei an awm rih lo a ni.
Khelh hnih tlawm zawn lai an nih avangin Sihphirin chak an mamawhna a sang a, TNT hmaah Niyas chuan point hmasa ber hmuin a hnu deuhah vawi li a hmu zawn a, 9-4-in an sang nghal. Muanna Veng team-in an inkar an tizim mai thei lo va, a hnuah 22-17-in Sihphir an sang leh.
Niyas chuan a hma leh hnung atangin a hlap tla hnem a, Mapuia’n pangngai takin set hmasa berah a thlawp bawk. Valbuanga, Zodinga leh Vanlalchhantluanga Sailo chuan vaw tlain TNT-in an inthlau lutuk tiziaawm mah se 24-22-a hniam zawk an nih lain Valbuanga’n a hnung atangin line pawnah a hlap chhuak a ni.
Hriam leh zualin set hnihnaah Sihphir an inlan a, Niyas chuan tum li vaw tla zawnin 4-0-in an sang leh nghal. TNT-in Mizo player-te vuak an dan theih viau laiin Indian Navy player an dang hneh lo a, point kuaa inthlau chungin Sihphirin set an la zawn.
Set thumnaah thil awm dan a danglam hret a, Valbuanga’n point hmasa ber hmuin an inkhelh chhunga TNT-in hma an hruai hmasak ber a ni a, Albert Zothankhuma’n a vuak sual hnuah 3-2-in an sang leh. Kawng dik zawh zui thei lovin anmahni thovin hma an hruaina an pawt hniam a ni.
Zodinga’n a service sual hnuah Valbuanga’n a vaw kai lo va, ho taka an hlah bawk avangin 5-3-in Sihphir an lehpel a, a tawp thlengin hawi kir lovin an sang tluan. A tawp lamah H Lalrinmawia hlap dang tlain TNT-in 20-18-in an hnaih hman na a, Niyas chuan vawi thum a vuak tlak karlakah Valbuanga leh Lalmama’n an hlap tla thei lo.
Sihphirin kalsanin point khat neih belha chak thei turin 24-18-in an sang. Lalmama leh Zodinga’n point hmu zawnin Niyas-a vuak an dang tla bawk a, TNT-in tum thum dang thei mah se Kerala spiker chuan an chak nan chiang takin a hlap tla ta tho a ni.
-- Advertisement --
FIXTURE
MAY 12, 2025 (THAWHTANNI) – 8:00 PM
Hunthar vs Tuichangral (mipa)
MAY 13, 2025 (THAWHLEHNI) – 8:00 PM
Luangmual vs Bungkawn (hmeichhia)