Italian champ leh hmasaber Paolini

Italian champ leh hmasaber Paolini
Italian Open khelhna ram Italy hmeichhiate zingah an ram claycourt tournament liana hmeichhe singles title hawn thei kum 1985 hnu lamah an awm leh ta ngai lo a, chu trophy chaka an tuihal huam huamna chu Inrinni khan world number five Jasmine Paolini chuan a rawn tidai ta a ni!
Tuscany lam chhuak Paolini hian Italian Open final-ah harsatna lian tawk loin American world number three Coco Gauff lakah 6-4, 6-2 hnehna a sualchhuak a, a career-a a claycourt title hraw ber a nih rualin 1000-level title a lak vawihnihna a ni a, a hmasa zawk chu nikum Dubai Championships-a a hlawhtlinna kha a ni.
Kum 29 mi tan Rome khaw tournament-a champion hi May ni 25 mai atanga khelh tan tawh tur French Open inbuatsaihna sehsam atan inrintawkna sang zawk siamsaktu a ni dawn tih a chiang a; nikumah runner-up a ni a, kuminah hian Roland Garros mualah title a hlawhchhuak zo tawh dawn em kan thlir ang.
Inrinni final-a Gauff a hmachhawn chhung zawngin home supporter-te tan a hlawh a, hnehna a chan rualin Foro Italico chhunga pungkhawm a chipuite’n thawm ring tak an chhuah a, an zingah hian Italian president Sergio Mattarella pawh a tel!
Tun kha kum 1985 champion Raffaella Reggi hnu lama home player kuta Italian Open women’s title a luh leh vawikhatna a ni a, kum 1930-a he tournament khelh tan a nih atangin Italian hmeichhiate an champion vawi lina a ni nghal bawk.
Inkhelh ban court chhunga an kawmnaah Paolini chuan Italian Open khelh chhunga a khelh thatah lawmpuina a hlan a, player ropui leh mihring mihrinna zawnah pawh hmeichhe duai lo tak a nih thu a sawi.
Italian Open a lak avangin tukin zinga ranking thar tarchhuahah Paolini hian world number four a luah chho a, tunkar tawp Pathianni atanga khelh tan tur French Open lamah pawh a top-four seeding a chang pha dawn a ni.
Rin loh taka nikum lama French Open leh Wimbledon finalist rawn ni chho nawlh Paolini nena an intum hnuhnung vawi thumah Gauff vawi hnih chak mah se 2023 US Open champion hi Inrinni zan khan Italian player lakah a khel tha chhuak zo tlat lo a, thla hmasa Madrid Open final-a world number one Aryna Sabalenka a hneh loh ang bawkin Rome khawpuiah pawh title hawn lo zawng bawkin a khawsa zui leh ta a ni.
Champion zo ta chiah lo mah se Gauff tan Rome-ah khan lawmna tur a awm nual tho a, final a luhna kawngah Paris-a hneh ngai tura rin ho Chinese Paris Olympic gold medallist Zheng Qinwen, Russian tleirawl thawm nei lian Mirra Andreeva leh US Open champion hlui Emma Raducanu-te a hneh a, tualchhung nula tantu ngah leh boruak hraw tak keng tel lakah ni danga a khelh thin dan pha lo deuh mah se French Open atan a hlauh phah dui hauh lo ang!
Paolini hian nizan khan women’s doubles final khel zui lehin, result tarlan hman a ni lo a, a chak chuan a trophy cabinet-a suanluh tur a neih belh leh dawn a ni.
He final match-a a tumpui hi Paris Olympics-a doubles gold medal a lakpuinu Sara Errani bawk kha a ni leh a, an tumpuite chu Veronika Kudermetova leh Elise Mertens tangdun an ni thung.
Kum 1990-a vul Monica Seles kha Rome khaw tournament-a singles leh doubles-a champion kawp thei hnuhnungber niin, Paolini hian Monica hnung a zui zo em tih tarlan hman a ni ta lo.
Nizan Italian Open mipa singles final lamah pawh Paolini chipui Jannik Sinner chuan Carlos Alcaraz a hmachhawn a, anni chin pawh hi tarchhuah tur a awm rih lo.