Verstappen chak ve leh ta hlawl!

Verstappen chak ve leh ta hlawl!
World champion vawili ni tawh leh champ lai ni bawk Red Bull chhuanvawr Max Verstappen chu kuminah a vul hlei thei ta tlat lo a, 2025 F1 world championship vawi ruk tlan tawhah vawikhat chiah a la chak a, driver standing lamah pawh top two a luah phak tawh loh hnuah Pathianni khan Italy ramah a rawn chak ve leh ta nawlh a, a zawna a kum lina atan Emilia Romagna Grand Prix-ah hnehna a chang.
Kum 2020 khan Imola hi Formula 1 calendar-ah a kirleh a, kha mi hnu khan intlansiak vawi nga awm tawhah Verstappen hi vawi li a chak tling ta a ni.
Bologna khawpui daifema Italian circuit-ah hian kum 2021, 2022 leh 2024 khan pakhatna a ni vek a, kum 2023-ah erawh he lai biala tuilian nasa avangin race kalpui a ni lo a, kuminah pawh a tlankawng hman thiam pakhatah hnehtu a rawn ni leh a, Formula One leader Oscar Piastri vawithum chak zawn mek chu a rawn chelhding ta a ni.
Imola tlankawnga a hnehna nuamsa sualchhuah leh tak kha Red Bull tan grand prix-a tum 400 an chakna chiah niin, Dutchman Verstappen tan a career bika vawi 65 a chak tlinna a ni thung.
Pathianni intlansiakah Australian Piastri khan pole atangin bul tan mah se pathumna a ni pha chauh a, a tawp hma lap sarih la awmah tyre thar nena rawn ving a team-mate Lando Norris chuan a lehpel ta a; ti hian, tun season-a round sarih an tlan tawha vawili chak tling tawh McLaren driver Piastri hian championship kal laiah hma la hruai chhunzawm bawk mah se Norris laka a chungnunna hi point 16 atangin point 13-ah a tlahniam ta a ni.
Qualifying-a 12-na daih ni chungin seven-times world champion Lewis Hamilton chuan Ferrari car vuan chunga Italy leilunga race a hmachhawn vawikhatnaah rin loh takin palina lai a luah pha a; Williams khalhtu Alex Albon chu panganaah thlengin, parukna chu Hamilton-a team-mate Charles Leclerc a ni.
Pathumna atanga bul tan George Russell chu pasarihna daihah thlengin, harhtharna chang mek Williams tan Carlos Sainz chuan pariatna a hauh ve bawk.
Racing Bulls rookie Isack Hadjar chu pakuana niin, Verstappen-a teammate Yuki Tsunoda chu Inrinni qualifying-ah chesual nasa viau mah se point hmuh theihna hniam ber sawmnaah a thleng zui ve leh ta tho a ni.
Kartawp hian Monaco-ah F1 driver-te an fuankhawm leh dawn a, street circuit chep leh inlehpelh harsa zetah hian chak ber tur hriat a harsa leh dawn a ni.