Team tha Khatla South leh Nursery veng inlan zan! 01 killer 02 leh 05 fiahna paltlang zan ni bawk!

Team tha Khatla South leh Nursery veng inlan zan!
01 killer 02 leh 05 fiahna paltlang zan ni bawk!
Icfai University Inter veng basketball tournament U 23 chinfel kar a ni a, zanin hian semi final luh inchuh turin dar 6:30 ah Khatla South leh Kolasib an innuai dawn a, inkhel hnuhnung zawk dar 8:00 ah Nursery vengin Lunglei an hmachhawn zui dawn – inkhel en tum thutna tha chan duh tan Hawla Indoor Stadium pan hma a tul ang.
Karei! Khatla South vs Kolasib
He match tluka en chakawm hi a awm kher lovang. Khatla S tan ‘ The 4 J’s – Joel, Johan, Jacob & Jojo’ an rawn inlan leh thap a rinawm a, an star player cool raih mai Hmachhuana a la awm cheu.
He team hi Opa Varte in a kaihruai a, ani hian an veng tlangval rual theihna leh thiamna hi a hrechiang a, a rem fuh leh viau a rinawm – boss ber erawh match official thutlukna thenkhatah a insum theih loh palh a hlauhawm – tawnhriat a neih erawh a hun takah a rah thin.
An match hnuhnung bera inhliam Abraham-a a khel thei tur hi chanchin duhawm a ni.
He veng hi lian lo mah se, basketball record tha an neih te erawh hi chu a lian mai ni lovin a turu!
An veng mipuiin an thlawp tha leh dawn sa tih hi a sawi lawk ngam. An veng naupangten rual u zawk entawn tlak an nei hi inchhuanna tham a ni.
Kolasib lam hi an thawm a ring hluai lo na a, match hmasa lama an thal te hi Ramhlun South, Champhai leh Tuikual South te an ni tlat – 01 killer hian Mizorama basketball chanchina palian Champhai an dah tha thei bawk tih hi hre tel ila.
He team hi hruaitu tha nei khua an ni a, an rawn par chhuak mek. Mimal hming thurchhuah hran ngai lo, team game khel bur an ni a, tawiawmtu tha an neih erawh a ngai, an mamawh!
02 palian rual nge Nursery veng?
Chhim rapper rothap AP Hnamte khan G’nie hma ah engnge a sawi kha? “2 is better than 1” a ti lo’m ni – hei kum 7 hnuah kha thu kha tisa ah a chang e!
Aizawla veng lian leh MSL club innghahna Chhinga veng chu 02 hma ah an tlawm!
Chaltlang an hneh dan te leh Saiha an puanthuah tel tura an thawn haw tak dan te kha Lunglei mipui tan chhim lamah ‘development’ basketball-ah bik a thlen nasat zia phochhuaktu a ni.
An district President Moses Lalrinchhana ngei maiin a ho thei a, an coach Valpuia in luah Kulikawna innghat he team hi an district basketball association leh LMC lamin an senso an tum sak. 02 lamin an player tha Mka leh Joseph-a te ho hi an tawiawm that a rinawm.
Hringnunah hian tawlh thluk chang pawhin tho leh tura huaisen nih hi game kaihruaitu zia ni turin a tha tawk tih Nursery veng coach Atluanga hian a nunah a lan tir a, naupang chhertu a ni zui.
Nursery veng maw? MSL X super star Emmanuel-a te veng, Khatla TBL player Miller-a chenna a ni a – tunlai rawlthar tha rual te awmna a ni bawk.
An 6th man Vanlalhlimpuia hian player to watch huang luah pha a nih zia an game hnuhnung berah khan a phochhuak.
Champion tur khawpa tha an ni a, pressure hnuaiah erawh coach an ngaihchan thiam a ngai ang.
An tum tawh leh an paltlang tawh Aizawl venglai, Ramhlun North leh Mission vengthlang te hi sulhnu nei tha thiau an ni a, mimal lansarh tum an awm loh chhunzawm chuan U 23 champion nomawi hian an veng lam a tinzawn ruak – veng mipui tawiawm erawh an mamawh ang.