Mizo tleirawl pahnih telna Indian Junior Women’s Hockey Team Argentina panin an chhuak ta…

Mizo tleirawl pahnih telna
Indian Junior Women’s Hockey Team
Argentina panin an chhuak ta…
Lionel Messi pianna leh tun thlenga a khaw behchhan la ni mek Argentina rama Rosario khawpui panin Nilaini khan Indian Junior Women’s Hockey Team chuan Kempegowda International Airport, Bengaluru atangin India an chhuahsan a; Argentina ramah hian team pali inelna Four Nations Tournament an khel dawn a ni.
Tarlan tawh thin angin, India team-a Mizo tleirawl pahnih kan hmelhriat mek PC Lalrinpuii (Hnahthial) leh Lalthantluangi (Kanghmun South)-te hi Lalremsiami Hmar inzirchhuahna hmun Thenzawla Women’s Hockey Academy pum chhuak ve ve niin, he hmunah hian kum 2014 atang khan hockey khelh an zir tan a, nikum mai khan an pahnih hian India chu Women’s Junior Asia Cup 2024-ah an champion-pui tawh nghe nghe.
South America khawmualpui lam daih daiha tournament khel tur zingah pawh thlanchhuah an ni zui ta zel a ni.
He friendly tournament hi kumin Decemder thlaa khelh tur FIH Hockey Junior Women’s World Cup atana India team inbuatsaihna niin, a thlengtu Argentina bakah South American team dang pahnih Uruguay leh Chile-te nen Messi-te khuaah hian champion nih an inchuh dawn a ni.
Ruahman lawk ang chuan he tournament hi India huna naktuk, Pathianni, May ni 25 atanga June ni 2 thleng awh tur a ni.
Four Nations Tournament-ah hian Indian team chuan team dang pathumte hi match hnih theuh an inkhelhpui dawn a, kumin World Cup atana inpuahchahna a nih angin India coach-te pawhin team performance an thlir uluk dawn a, an combination leh strategy enchhinna tur a ni.
Indian squad hi coach Tushar Khandker chuan a ho a, goalkeeper Nidhi chu captain niin, forward Hina Bano chu vice-captain a ni thung.
Team member dang han tarlang chhunzawm ila; second goalkeeper chu Engil Harsha Rani Minz niin, goal-veng standby atan Vidyashree V hruai tel a ni.
Defensive unit lamah Mamita Oram, Lalthantluangi, Manisha, Puja Sahoo, Parwati Topno, Nandini, leh Sakshi Shukla an awm.
Midfield-ah Priyanka Yadav, Anisha Sahu, Rajni Kerketta, Binima Dhan, Khaidem Shileima Chanu, Sanjana Horo, Supriya Kujur leh Priyanka Dogra-te thlan an ni a, standby midfielder pahnih Huda Khan leh Munmuni Das an la awm bawk.
Forward line lamah Hnahthial tleirawl Rinpuii bakah Hina Bano, Sonam, Sukhveer Kaur, Geeta Yadav, Kanika Siwach leh Karmanpreet Kaur an awm a, standby forward chu Selestina Horo a ni ve thung.
Naktuk, Pathianni hian an match hmasaberah India hian Chile an tum dawn a, May ni 26, Thawhtanniah Uruguay su zui lehin, first round tawpnaah May ni 18, karleh Nilaini khian a thlengtu Argentina an hmachhawn dawn a ni.
An inkulhna Bengaluru atanga an thlawhchhuah dawnin Indian Junior Women’s Team captain Nidhi chuan Argentina rama Four Nations Tournament khelh chu team pumpuiin an chak tawhin, an phur takzet tih a sawi a; chu mi atan team an thawkrim a, thahnemngai taka training an kalpui tauh tauh rah chu an seng ngei a beisei thu leh an aia team khawng zawk an su tur chuan anmahniah hmasawnna a thlen ngei a beisei thu sawiin, eng team pawh hmachhawn tura an inrintawk thu a tarlang tel.
Coach Khandker chuan Argentina ram tournament-ah hian an squad-a player tha ber ber-te zawnchhuah an tum dawn tih a sawi a, Junior World Cup thlan hmaa thla ruk chiah hun a awm tawh avangin World Cup atana squad tha ber ber dinchhuak turin he tournament hi a pawimawh hle dawn niin a sawi.
India coach hian he tour hi a player-te tan international exposure leh experience tha lutuk a nih thu sawiin, long term thlir chunga senior team an luh chhohna kailawn pawimawh a nih thu leh major tournament an tih chin World Cup-te anga chetthat chu senior team-a an hma hun zel tur atan a pawimawh tih a tarlang tel.