Kerala vaukama lawng letah tuialhthei bua la hmu lo

Kerala vaukama lawng letah tuialhthei bua la hmu lo
Mihring tana hlauhawm thei container 13 tela container 640 phur, Kerela-a Kochi tuipui kama chesual, Liberian lawng lian atangin tuialhthei buai a la awm lo niin an hria.
Lawnga thawktu awm 24 chu chhanchhuah vek an ni a, defence ministry chuan Pathianni thleng kha chuan tuialhthei bua a la awm lo nia an hriat thu a sawi a. A lo baw palh a nih pawhin lo buaipui turin Indian Coast Guard (ICG) leh Indian Navy an inring reng tih a sawi.
“Liberian bungraw phur, MSC ELSA 3 (IMO NO. 9123221) hi Pathianni zing dar 07:50 vel khan Kochi vaykamah tui lian vangin a chesual a. Lawngin container 640 a phurh zinga 13 hi hlauhawm tak thil a ni a, 12 hi calcium carbide a ni a. Lawngah hian diesel MT 84.44 leh furnance oil MT 367.1 a awm bawk,” tiin ministry chuan a sawi.
Thawktu 24 zinga 21 chu Inrinni khan ICG-in an chhanchhuak a, a dang pathum pawh INS Sujata hmangin, ICG puihna nen chhanchhuah an ni.
Kerala tuipui kamah hian tuia cheng chi nungcha tam tak an awm bakah khualzin tlawh nasat hmun a ni a. Hei vang hian a bawlhhlawha nungchate huat zawng a darh hlauh a ni a, ICG chuan chutiang a thlen loh nan chuan hma an la a, state sorkar nen pawh a theih ang angin an thawk ho niin a sawi.
“Tuipuia tuialhthei bua hre thei leh chhuia buaipui thei ICG thlawhna tirh chhuah tawh a ni a. Bua a awm hriat a la ni lo,” tiin defence ministry chuan a sawi.
Kerala State Disaster Management Authority (KSDMA) chuan mipuite chu tuipui kamah lawng lian atanga put tuialhthei leh thil dangte chu khawih miah lo turin hriattirna an tichhuak tawh.
Mipuite hi vaukamah lawng tuialhthei nia ngaih an hmu a nih chuan police hnena hriattir vat turin an ti bawk.
ICG chuan lawng hian Marine Gas Oil (MGO) leh Very Low Sulphur Fuel Oil (VLSFO) te pawh a phur tih an sawi.
ICG hian Inrinni khan lawng atanga kohna an dawn avangin thlawhna leh lawng an tir chhuak a, Kochi chhimthlang tuipui mel 38 vela hlaah an inbuaipui a ni.
MSC ELSA 3 hi Vizhinjam atanga Kochi pan a ni a. Tuipuia an awm lai hian buaina tawkin ICG an biak hnuah Kochi-a Maritime Rescue Sub-Centre (MRSC) tirh chhuah nghal an ni.
Inrinni khan thawktu Russia, Ukraine, Georgia leh Philippines ram mi 21 chhanchhuah an ni a. Mi dang pathum erawh la awm tura tih an ni a; mahse, lawng dinhmun hi hniam zelin Pathianniah a leh tak avangin INS Sujata hmangin mi dangte pawh chhanchhuah zui an ni.
Defence PRO chuan lawng neitu company pawhin a hmun hi thleng tawhin Indian thuneitute nen thil kalpui zel dan turah an inrawn zel tih a puang.
Chhanchhuah hna thawhnaa bultumtu ber, ICG leh Indian Navy lawngten a bul hnaiah awmpuiin an vil reng tih a puang bawk.