Monaco kawtthlera tlan chak ber Norris

Monaco kawtthlera tlan chak ber Norris
Pole position atanga tlan chhuak Lando Norris chuan Pathianni khan a career-a a vawikhatna atan Monaco Grand Prix hnehna a sualchhuak ve ta nawlh a; season kal lai intlansiak vawi riata a vawi hnih chakna niin, a McLaren team-mate Oscar Piastri chu pathumnaah a thleng ve bawk a, lawmman semna dawhsanah McLaren driver pahnih an ding.
Australian Piastri chuan Formula One drivers’ championship-ah hma la hruai che che mah se a hnuai chiaha pahnihna luahtu Briton Norris nena an inthlauhna hi point thum chiah a ni ta!
Ferrari driver Charles Leclerc chuan a home race-ah hnehna chang zo loin runner-up dinhmun a lungawipui mai a ngai a; palinaah Red Bull khalhtu Max Verstappen thlengin, top four-ho hian an bul tan dan ang vekin a hmawr an bawk kim leh thap a ni!
Thleng hmasaber Lando Norris tan tun kha kumin March thla Australian season-opener hnehna a chan hnua pakhatna dinhmun a luah leh vawikhatna a nih rualin McLaren team tan bik kum 2008 hnu lama Monaco tlankawnga an chak hmasakber a ni tel.
Chequered flag vaikhum a nih rualin Norris hi team radio kaltlangin a phul nghal hlut a, “Monaco baby!,” tih chu a sawichhuak hmasakber a ni.
Briton chuan a hnunga umtu pahnih Leclerc leh Max kha an hraw hreih hreih em avangin last quarter kha a hautak tih sawiin, Monaco tlankawng jarsa zeta hnehna a chang thei lawmawm a tih thu leh kha hnehna kha naupang a nih lai atanga a lo mangphan tawh leh hlawhtlinpui atana a duhthusamte zinga mi a nih thu a sawi.
Ferrari khalhtu Lewis Hamilton chu pangana niin, paruknaah Racing Bulls driver Isack Hadjar a thleng a; Haas mi chhawr Esteban Ocon chuan a dawt.
Pariatna luah chungin Liam Lawson pawhin season kal laia a vawikhatna atan Racing Bulls tan point a thawkchhuak ve ta nge nge a; top 10 luahtu dang pahnihte chu Williams driver ve ve Alex Albon leh Carlos Sainz-te an ni.
Mediterranean tuifinriat kam ni eng mawi tak hnuaia intlansiak ngaihven hlawhah Mercedes an talbuai a, qualifying-a an chetchiat tawh atanga kawng dik zawh zo loin sawm pakhatna luahtu George Russell chu point hmu pha lo tawk chiahah thlengin, an driver dang Italian rookie Kimi Antonelli chu tlanchhuak zo zinga hnuhnungber 18-na a ni bawk.
Aston Martin double world champion Fernando Alonso chu Monaco kawtthlera race bansan pahnihna niin, lap 38-ah a car khu luih luih atanga lo chhuakin, season kal laiah Spaniard hian point a la thawkchhuak zo lo chhunzawm zel!
Tun kartawp hian Circuit de Barcelona-Catalunya lamah Spanish Grand Prix tlan turin Formula One driver rual an fuankhawm leh ang.