Box office-ah ‘Lilo & Stitch’ a No.1

Box office-ah ‘Lilo & Stitch’ a No.1
Disney live-action movie ‘Lilo & Stitch’ leh Tom Cruise channa, Mission Impossible film tawpna ni tawh tur ‘Mission: Impossible- The Final Reckoning’ ten tun weekend kalta khan cinema hall boruak an tilun hle a, US-a Memorial Day weekend-a cinema hall ticket hralhna sum che vel tam ber tum a la ni.
North American box office ranking hi weekend (Zirtawpni – Pathianni) a US-a cinema hall ticket hralhna teh thin a ni a, ‘Lilo & Stitch’ hian tun weekend kalta khan US-ah cinema hall ticket hralhna atangin dollar maktaduai 145.5 la lutin, No.1 a ni a, US pawna a lak luh nen dollar maktaduai 341.7 a la lut thei! Hetihrual hian Mission: Impossible- The Final Reckoning pawhin US-ah dollar maktaduai 63 la lutin, ramdanga a lak luh nen chuan dollar maktaduai 190 a tlin ve nghal bawk.
‘Lilo & Stitch’ hi dollar maktaduai 100 senga siam a ni a, Hawaiian hmeichhe pakhatin, ui ang deuh alien, buaina siam thiam zet mai a neih dan vel tarlanna a ni.
Tom Cruise channa, Mission: Impossible – The Final Reckoning hi M:I franchise tawpna tur a ni tawh a, he film hi marketing tel lo pawhin, dollar maktaduai 400 budget-na movie a ni hem maia, opening weekend-a a sum lak luh tam tham viauin lang mah se a hma lam hun a khirh ve riau dawnin a lang.
‘Final Destination: Bloodlines’ pawh a la chetha viau a, dollar maktaduai 19.65 la lut lehin No.3 a la ni thei a, he film hian kar hnih chhungin US-ah dollar maktaduai 94.6 la lut tawhin, US pawna a lak luh nen chuan maktaduai 187.1 a tlin ve tawh bawk.
Hollywood Box Office Top 10:
1 Lilo & Stitch $145,500,000
2 Mission: Impossible—The Final Reckoning $63,000,000
3 Final Destination: Bloodlines $19,650,000
4 Thunderbolts* $9,164,000
5 Sinners $8,750,000
6 The Last Rodeo $5,266,330
7 Friendship $4,591,384
8 A Minecraft Movie $2,210,000
9 The Accountant 2 $1,970,000
10 Hurry Up Tomorrow $740,000