Ruihhlo ngai enkawlna hmasa Short Stay Centre din dan rel

Ruihhlo ngai enkawlna hmasa
Short Stay Centre din dan rel
Tunlai Mizoram boruak thlir chungin ruihhlo ngaite enkawlna hmasa, Short Stay Centre din chungchangah a kaihhnawih mi hrang hrang chu Social Welfare department inrawnkhawm a neihpui.
Inrawnkhawmnaah hian Mizorama ruihhlo ngaite enkawlna hrang hrang leh an tun dinhmun sawizau a ni a. Rehabilitation centre /home leh chutiang hmun piahlama ngawlveite lo enkawl hmsakna atan Short Stay Centre (SSC), mi tam zawk lenna leh hmun khat mai ni lo din mamawhna leh harsatna awm theite sawiho a ni.
Din ngei tha an ti a. A kalpui dan leh enkawl zui dan tur, hmalak dan ngaihtuah tura Core Committee leh Task Group din nise tih a ni.
Social Welfare director Dr Lalhriatzuali Ralte chuan, an zirchian tawhnaah awmze nei taka ruihhlo ngawlveite enkawl tur chuan hun rei tak a duh a, a lo berah thuang thum – deaddiction, rehabilitation leh after care kalpui a ngai a, thla engemawzat hun a duh tih a sawi.
“Tuna kan dinhmuna kan mamawh hmasa ber chu Short Stay Center hi siam a, detoxification tih phawt a, an hriselna endik leh eitur tha leh counselling pek a ni a, chumi atan chuan SSC hi hman a ni ang. Mithiam enkawlna hnuaia kalpui a ni ang. Ruihhlo ngaite chu ni 15 vel hetianga SSC-ah enkawl an nih hnu ah rehab centre emaw camping hmun emaw ah enkawl zui leh a tul a, chu’ng hmun an chhuahsan hnu ah pawh an taksa leh rilru dinhmun azira medical leh psychological care follow up tih bakah after care tih chhunzawm a tul a ni,” a ti.