DR Congo khawpuia lei min leh tui lianah mi 29 thi

DR Congo khawpuia lei min leh tui lianah mi 29 thi
Democratic Republic of Congo khawpui, Kinshasa-ah khaw ro lai hun lai taka rin lawk loh ruah tam tak sur avanga lei min leh tui lianah mi 29 vel thi an awm tawh niin interior ministry-in a sawi.
Chenna in tam tak tui lianin a la a, kawngpuite tuiin a chim a, hmun zau takah power supply a awm lo va, khawpuiah hian ni thum chhung ruah tam tak a sur tawh.
DR Congo-a meteorological agency Mettelsat chuan Inrnni tukah khan ruah mm 90 a sur thu leh an rama fur hun lai, November leh May inkara ni khata sur thin ai pawhin a sur tam zawk niin an sawi.
Mi thiamte chuan ruah tam tak sur hi sik leh sa inthlak nasain a nghawng chhuah niin an sawi a. Chhiatna nasa tak a thleng chu khawpuiah ruahmanna fel a awm loh vang leh tui luanna tha a awm loh vang niin an ngai bawk.
Kinshasa hi khawvela lui sei ber zinga mi, Congo lui kaa awm niin an ram dung tluan a luang a ni.
Khawpuia cheng tam tak hi in sak tha lo tak tak leh tui lianin a tihbuai mai theihna hnaih tak takah an khawsa hlawm a. Mihring an pung chak a, an ram hmun dang atanga pem lut an tam em em bawk a ni.
Kinshasa-a chengte mi maktaduai 18 dawn an ni tawh a, Macrotrends-in kum 2024-a an pun chak dan tur a chhut lawk aiin an tam tawk zawk a ni.
Interior ministry chuan thuchhuah siamin tui lian an tawrh mek hmachhawn dan tur leh harsatna tawkte puih dan tur sawihovin Interior Minister Shabani Lukoo-a hova thutkhawm a nih thu an tar lang.
Sorkar hian thi chhungte an tawrhpui thu sawiin mi 29 thite chu an vuinna senso an tumsak vek dawn thu an puang bawk.
May thla khan DR Congo khawchhak lam, South Kivu region-a tui lianah mi 100 chuang thi an lo awm tawh a, April khan Kinshasa-ah mi 30 chuang an lo thi tawh bawk.