Russia-in Kyiv a beihnaah mi 10 thi leh

Russia-in Kyiv a beihnaah mi 10 thi leh
Russia chuan missile leh drone thahnem takin Ukraine khawpui, Kyiv beiin mi 10 vel an thi a, mi dang 100 chuangin hliam an tuar niin thuneituten an sawi.
Drone pakhatin apartment block fuhin flat thahnem tak a chhia a, Ukraine-a interior minister chuan drone 440 leh missile 32 hmanga beih an ni tih a sawi.
Thuneitute chuan a tirah an khawpuiah hian mi 15 an thih thu an sawi a, a hnuah 10 an ti leh a, chhim lama lawngchawlhna khawpui, Odesa-ah mi pahnih an thi bawk.
Thawhtanni zan atanga a tuk zing thlenga Kyiv-in beih a tawh hi Russia-in an ram a rûn atanga an khawpui ber a beih nasat ber zan a ni a, President Volodymyr Zelensky-a chuan ‘beihna nasa ber pakhat’ tiin a sawi.
Russia-a defence ministry chuan an tum ber chu Ukraine-a military-industrial complex-te a nih thu leh an tum a fuh vek thu a sawi.
Kyiv beih hian darkar kua chuang a awh a, mi cheng tam tak chu lei hnuaia himna hmunah zan lai rik hmaa lutin zing ni chhuah thlengin an tawm hlawm.
Thuneitute chuan ballistic missile-in district pakhat chhawng kuaa sang apartment building fuhin khawpuia hmun 27 beih a nih thu an sawi a. Solomyanskyi district-a in hi a luhna pui ber a chhia a, thi leh hliam zat hi a la pun theih thu an sawi.
Kyiv Mayor Vitali Klitschko chuan US khua leh tui kum 62 mi pawh a thih tel thu a sawi.
Klitschko-a chuan apartment 40 chuang a chhiat thu leh heng chhe karah hian mi tang an la awm theih thu a sawi a. Russia hian mi thi an tam theih nan ball bearing-a thuam cluster bomblet hmanga a beih thu a sawi bawk.
Interior Minister Ihor Klymenko-a chuan Russia hian chenna, vantlang tana pawimawh leh zirna in thlengin a kap niin a sawi.
Russia hian tun hnaiah Ukrainian khawpuite a bei thar nasa hle a, Ukrainian air defence system-in a dah theih loh nan drone leh decoy thahnem tak a thlawhtir thin.