Trump-a’n chawlhkar hnih chhungin Iran laka a thutlukna siam dawn

Trump-a’n chawlhkar hnih chhungin Iran laka a thutlukna siam dawn
US President Donald Trump chuan chawlhkar hnih lo awm leh tur chhungin Iran-Israel buainaa a inrawlh dawn leh dawn loh a tichiang dawn niin White House-in a sawi.
White House-a thuthar lakhawmtute a kawmnaah Press Secretary Karoline Leavitt-i chuan Trump-a thuchah a chhiar chhuak a. “Kan hmaah hian Iran nen indawrna hun remchang a awm thei mai thei a, a awm lo mai thei bawk a, chumi azir chuan chawlhkar hnih lo awm leh tur chhungin kan tel ve dawn nge dawn lo tih thutlukna siam a ni ang,” a ti.
Hemi hma lawk hian Iran-a deputy foreign minister chuan BBC hnenah US hi indonaa a tel ve a nih chuan ‘hremhmun’ ang a nih dawn thu sawiin, “America-a indona a ni lo,” a ti.
A hma darkar 24 maiah khan Trump-a hian indonaa tel ve leh ve loh a rilru a la siam loh thu a sawi.
Leavitt-i chuan President Trump-a ‘ngaih pawimawh ber’ chu Iran-in nuclear ralthuam a siam loh a nih thu a sawi.
Press secretary hian Iranian hotute White House-a an zin emaw, Trump-a’n US inrawlhna tura Congress thutlukna a lak emaw chungchang engmah a sawi lo.
Trump-a leh a sorkar hian an tel ve a nih pawhin eng angin nge an chet dawn tih an la sawi lo va. “Kan tel mai thei, tel lo mai thei,” tiin Nilaini khan amahin a lo sawi tawh.
Trump-a sorkar hian Iran-in nuclear ralthuam a siam hlawhtlin hi ‘a hnai vak lo’ niin an ring a. Hetih lai hian amah tak hi chuan intelligent-ten kumin kum tira Congress-a Iran-in ralthuam siam a tum lo tih an sawi chu a pawm bur lem lo bawk.
Iran Supreme Leader Ali Khamenei-a chuan Trump-a’n inpe tura Nilainia a tihna chu a lo hnawl tawh.
CBS chuan Trump-a hian Iran beih hi a pawm tawh a; mahse, kalpui tak tak turin thutlukna a la siam lo mai chauh niin a tar lang a. President hian Iran-in a nuclear programme a tihtawp hlauh beiseina avangin a la che chhuak lo nia tar lan a ni.
President hian Iranian nuclear site Fordo chu kah chhiat a duh nia sawi pawh a awm a. Tehran erawh chuan he hmuna thil sawngbawl hi vantlang hman atan a nih thu a sawi thung.
Indona kal mekah hian indawrna pawh a awm mek zel a, Zirtawpni khan European foreign minister-te chuan Switzerland-ah Iranian aiawhte an hmu.
Leavitt-i pawhin American aiawh leh Iranian-te an la inbiak chhunzawm niin a sawi bawk a. US special envoy Steve Witkoff leh Iranian Foreign Minister Abbas Araqchi te pawh Israel-in kar hmasa tawp atanga Iran a beih hnuah phone-in an la inbe reng tih sawi a ni bawk.
Trump-a’n chawlhkar hnih hun a tiam lai mek hian Ningani tuk khan Israel chhim lama damdawi in chu Iranian missile-in a kap fuh a. Iranian sorkar chanchinbu chuan damdawi in bula sipai hmun a tum niin a sawi.
Israel-a health ministry chuan Soroka Medical Centre beihnaah hian mi 71 an hliam niin a sawi.
Israel-in kar hmasa Zirtawpni atanga Iran a kaha beih let a tawh hnuah mi 24 thi an awm tawh a. Iranian sorkar chuan an ramah Pathianni thleng khan mi 224 an thi tawh niin a sawi ve bawk.
Human Rights Activists News Agency (HRANA) erawh chuan Iran-a thi hi mi 639 an tling tawh niin a chhinchhiah.