CLIMATE SMART, SUSTAINABLE FARMING – 25

RK Dawla
Mb 9366095658

1. June thla tâwp lam kan thleng leh ta a. Kum khata ni rei ni ber kha nimin piah lawk, June 21 kha a ni a. Heta tang hian zan hun a rei chho hret hret ang a, chutih rualin chhun hun a rei lo hret hret thung ang. Mizote hian daily-in hlawhfa kan thawkin kan inruai tlangpui thin a. Hei hi Pi leh Pu atanga a ni ang zawnga kan inlâwm thin kan chhawm zel pawh a ni âwm e. Mahsela, tun laiah chuan, ram changkang zawkah chuan a darkar ang zawngin an inruai tlangpui thin. Mizote inrawih dan, daily hisâp hi chuan a hna azirin khawchhiat leh that inkar te, thlasik ni rei loh lai leh nipui ni rei lai pawhin kan inrawihna a ngai pât mai a. Chubâkah, hna thawk rei duh deuh leh duh lo thinte tân rate a thuhmun tlat mai a. A ruaitu leh hlawhfa tân a fuh lohna tam tak a awm thin. Tin, farming kaihhnawih hnate hi chu physical deuh tak a nih avangin, darkar khat leka inrawih rei or rei loh khan hnaah kawngro a su êm êm mai a, a thawktu kan hah hlei hle bawk. A nihna takah chuan hlawhfa dinhmun a chêp viau a ni, tuna kan inrawih thin danah hi chuan. Chuvang chuan, AI Khawvelah kan chêng tawh a, hlawhfa kan inrawih danah pawh hian bung thar kai a, a darkar ang zawnga kan inrawih a hun tawh êm êm a ni.
2. Hnam dangte ngaihtuah chuan Mizote hian hna kan thawk tam lêm lova. Kan chaw ei dan leh ei hunin a zir lova, hlawhfa kan inrawih danin a zir lo bawk. Rate bitiam neisa (contract/theka) thawk kan nih loh chuan, kan hnathawh phung pangngai pêlin kan che ngai meuh lo. Hna tha, chak bawk si-a thawk tur chuan thil engkim ruahman lâwk thlip thlep a lo ngai a. Tin, zingkar leh zanah hun âwl tam tak tangkai lovin kan khawhral mai mai bawk. Inpêkna leh tum sânna tak tak tel lem lo, thenawm khawvengte zul zuia chêt la kan la tam êm avang leh nikhata darkar tam hnathawh kan nei lo hi kan ram leh hnam retheih chhan pakhat a ni tiin sawi ila, kan tisual lutuk âwm love. thalai ang zawng phei chuan, hna thawk mumal si lovin, zanah rual kan pâwl a, eng pawl pawl emaw-ah kan inhmang kûr dup a, zingah hnathawhna hun tha kan mut-bo leh teuh a. Tukthuan eikhamah ni kan han chhiar chauh mai hi chu – kan nunphung hian changkan leh hausak hlat deuh kan ni. Foreign-ah inhlawhin kan thalaite an chhuak nasa a, heta an va thawhnaa an work culture that bikzia leh nikhatah pawh an hnathawh darkar tam bikzia hi kan sawi uar ngai lova, an hlawh thatzia chauh kan sawi a! A dik famkim lo a ni!
3. Farming chu khawvêla hna awm hmasa ber, hna upa ber a ni a. Khaw chhiat leh thatin kawngro a sû nasa bik a, khawlum leh vawh dan ringawt pawhin awmzia a nei thui bik êm êm. Chutih laiin farmer tam ber hian, sik leh sa milin ruahmanna kan siam chawp mai mai thin a. “Khua a chhe duh êm mai, inah awm mai teh ang, Ni a sa êm mai, chawhnu-ah thawk mai ang” etc kan ti mai thin. Thlen tum mumal (goal) kan neih tak tak chuan, nisat laia thawh tur, ruahsur laia thawh tur lo inruahman fel thlip thlep kha a ngai a. Football player-te hian inkhelh laiin ‘thli a thaw êm mai, ruah a sur êm mai, ni a sa êm mai – hah vak lovin khel teh ang’ ti ta sela, lehlam goal-ah sî phurhtir a har ngawt ang. Mahsela, Mizo tam tak rilru-ah chuan hetiang chiah hi kan ni. Goal kan nei lo emaw kan pêt goal-na tur si ban kha kan chiang lova, field laiah ball kan inpe kual mai mai a, khawvel mithmuhin kan ropui hlei thei lo a nih mêk hi. Mizo mipuite hian farming game kan khelhna a rei tawh hle nâ a, Coach tha leh Technical staff rintlâk kan mamawhna hi a sâng khawp mai. Kan ram leh hnam a lo dinchhuah a, mi ramte awt rêng rênga kan nun tawh lo nân players (farmer), technical staff (concern deptt) leh Coach (Sawrkar) kan harchhuah a hun e. Pakhat chauh pawh hi harh lo se, ram tiam kan thleng thei ngai lovang.