Khawpui chhunga ran vulh

Aizawl khawpui huam chhung (municipal area) ah ran (vawk & ar) vulh khap a nih hma kha chuan khawpui laili lamah pawh, rem leh rem lovin, mahni compound chhungah vawk leh ar vulh kan intihhmuh a. Mahni ei khawp bakah sum tuak nan kan hmang thin. Hei hian khawpui chhung a titawp mai pawh ni lovin, a hrisel lo a, midang tan ninawm leh rimchhia a siam a, khawpui hmelhmang timawi lotu leh titawptu a ni.
Khawpui sawrkar AMC chuan municipal area-ah vawk leh ar vulh a khap ta a, khawpui pawh a thianghlim sawt a, boruak rimchhia hriattur a awm ta lova, a thawven thlak ta hle. Heti chung hian, khawpui daifem lamah chuan, thenawmte nena inhriatthiamna thui tak nei chunga vawk leh ar vulh hi an la awm nual a; mahse, khawtlang tana hnawksak leh harsatna thlen tham erawh a ni lem lo a ni ang.
AMC sawrkar thar kan inthlang leh dawn ta a, political party thenkhat chuan khawpui chhunga vawk leh ar vulh khapna dan ennawn a, a tul anga siam that an tum thu an auchhuahpui leh ta a. Eng party kaihhruai sawrkar pawh lo ding se, vawk leh ar vulh hi chu kan hmuh leh kan lo tawnhriat tawh a nih avangin, khawpui thianghlimna, mawina leh hriselna tibawrhbang thei thil a ni a, khawpui chhunga vawk leh ar vulh lo chung pawha kan inenkawl theih tho tawh avang hian, ranvulh khapna thlahdul zawng hi chuan kal tawh lo hram ila, chu chu kan hma lam hun thui tak lo awm zel tur atan pawha kan thatpui tur zawk a nih a rinawm.
Tuna ranvulh inkaihhruaina kan neih mek ang hi chuan, khawpui daifem mihring chenna awm tawpna atanga khaw pawn lam feet 100 vela hlaah ranvulh hi la kalpui theih tho a nih hmel a. Hei pawh hi, a nihna takah chuan, khawpuia mi harsa zual (urban poor) te indawmkanna atana remchanna siamsakna a nih rualin, urban poor-te hi hlawkpui thama vawk leh ar vulh chiam thei an ni leh lem si lo a, mi hausa leh awmtheite bawk hian an tangkaipui zawk awm e.
Aizawl khawpui hi tun hnai hian khualzin ten an vawrh lar ta phian mai a, khawpui pawh a lo thang mawi chho ve zel bawk nen, tourist hiptu khawpui pawimawh tak a chang chho mek a. Khawpui thianghlim leh fai ni tura tan kan lak sauh sauh hi ‘tourism promote’ na tha tak a ni nghal dawn a ni. Tuna bawlhhlawh kan thehthang dan tha lo tak pawh hi ‘engtin nge ni ang?’ kan tih mek laia, election oriented-a ranvulh lam kan awn leh a nih chuan, kan khawpui hi kan tihmelhem zual zel ang tih a hlauhawm khawp mai.