India leh a thenawm inremah chauh J&K helna tawp ring

National Conference party President Farooq Abdullah chuan Jammu & Kashmir-a helna chu India-in a thenawm ram nena an inkar a tihthat hma chu a tawp dawn lo niin a sawi.
Shopian district-a thuthar lakhawmtuten an kawmnaah Abdullah hian Thawhtanni khan hei hi a sawi.
Jammu & Kashmir-ah helna a tawp tawh em tia an zawhna chhangin, “Helna hi kan thenawm ram nena kan inkar kan tihthat phawt loh chuan a tawp mai mai dawn lo a ni,” a ti a ni.
An union territory-a Kulgam district-a venhim hna thawktuten helho laka beihpui an thlak mek chungchang pawh sawi langin Abdullah chuan, “Beihpui thlak kalpui mek reng a nih laiin engtin nge helna a awm tawh lo tih kan sawi theih ang?” a ti.
Jammu & Kashmir hi India leh Pakistan-in an ram nia an chhal ve ve a ni a, hmun tlem ve ve chauh an thuhnuaiah an dah a. Ram inchuhin an inep fo va, Muslim tamna hmun a ni a, Pakistan atang leh a mi cheng zingah thenawm rama beh duh leh an puala ram hran neih tuma rawlrala che an awm reng a ni.