Project Chawlhna Krista Episode 2

Project Chawlhna Krista Episode-1 lo en tawh ten nghakhlel taka kan lo thlir ‘Episode-2’ chu peih a lo ni leh ta a. A hma ang bawkin Episode-2-ah hian Chris MS Dawngkima hla phuah 11 a awm.
Zaipawl hla, kan lo hriat fo tawh thin ‘Ngai rawh i ka-ah’ tih leh ‘Fak rawh u’ tih hlate chu Ramhlun North Pastor Bial Zaipawl te leh Peace Choir ten an sa a. Heng zaipawl hlate hi he project tihlu zualtu an ni.
‘Fakna a thang mawi’ tih hla Trio a Zoramchhani, Stacy leh Israela Pachau te sak tih loh hi chu hla hlui chan chang deuh vek a ni. Israela Pachau-in K|P Theme song pahnih ‘A chhelai siam thatu’ leh ‘Tho la êng rawh’ medley-a a sak chu ngaihthlak manhla tak a ni.
KTP General conference hla bua lo chuang tawh ‘Nang muhil meng la harh rawh’ tih te bakah Idol leh Icon vela solo a kan hla hriat lar tak pakhat, Synod Choir te pawhin an lo sak thin ‘Nang i thianghlim si’ tih pawh Melody leh Zorinsanga ten duet a an sak ngaihthlak tur a awm bawk. Kum 2004 chhoa hla lar ‘Hei hi ka ngen a che’ tih chu duet bawkin Steward te unau hian arrangement tharin an sa bawk a ni.
A project hming tumtu ber hla ‘Chawlhna Krista’ tih hi Cindy Lalthanpui’n a sa a. ‘Praise On’ atanga hming chher, Gospel huanga thalaite ngaihven tak Samuel Lalmuanchhana chuan ‘Lalpa chu a thianghlim e’ tih hla a sa a. Testimony hla ‘Hmangaih thuril ber’ tih chu Zorinsanga’n a sak bakah, Arini leh Isaac Hnamte te duet ngaihthlak tur a awm bawk. Heng hlate hi youtube lamah en theihin chhawpchhuah a ni a, channel hming chu ‘CHRIS MS DAWNGKIMA’ tih a ni. Live recording tih a nih avangin audio hi uluk theih tawpa khawih a ni a, belhchian dawl taka chhuahtu hi EFX Audio a ni.
‘Project Chawlhna Krista,’ Episode-2 hi zanin hian LPS 1-ah chanchin thar puan zawhah tihchhuah a ni dawn a, Zonet Zawlbuk-ah zanin dar 9:00-ah tihchhuah a ni bawk ang.