Kum 13-15 inkar vaihlo ti 58%
Kum 13-15 inkar vaihlo ti 58%
Mizoramah naupang kum 13 atanga 15 inkar zingah zuk leh hmuam ti zaa 58 an awm tih sawi a ni.
National Health Mission hnuaia thawk National Tobacco Control Programme (NTCP) chu Thawhlehni khan NHM Mizoram mission director Dr Lily Chhakchhuak kaihhruaiin hmalakna thlirletin an thukhawm a. Heta tarlan danin, April 2024 – March 2025 chhungin puipunna hmunah meizu 444 man an ni.
Tun dinhmunah naupang kum 13-15 inkar zingah zuk leh hmuam ti zaa 58 an ni tih sawi a ni a. Thangthar zawkten zuk leh hmuam leh ruihhlo an tih lohna tura theihtawp chhuah a pawimawh zia sawi niin, zuk leh hmuam sim duh tan District Hospital leh Mizoram State Cancer Institute Zemabawkah puihna – Tobacco Cessation Clinic pan theih a ni tih sawi a ni bawk.
2024 April atanga March 2025 chhung khan education institution-ah vawi 291, NGO leh kohhran hrang hrangah vawi 62 awareness campaign neih niin, training 40 an buatsaih. Puipunna hmun hrang hranga meizu leh zu lo enfiahin vawi 418 an thawkchhuak a. Vaihhlo leh a kaihhnawih ti thin mi 6645 chu ti tawh lo turin an intiam a ni.