US-in Israel-Gaza inkahhai kalpui zel theih nan tan a la

US-in Israel-Gaza inkahhai kalpui zel theih nan tan a la
Israel leh Hamas inkara inkahhai kalpuiin chawlhkar khat a tling awrh tiha kartawpa tharum thawhna a thlen leh hnuah a ngai anga kalpui zui a nih theih dan dapin US palai chuan Thawhtanni khan Israeli Prime Minister Benjamin Netanyahu-a hmuin a kal lehnghal.
Israel leh Hamas hian Pathianni khan US President Donald Trump-a rawt anga thil kalpui zel an duh ve ve tih erawh an sawi a. Hemi hma hian Palestinian-ten an sipai beia pahnih an thah hnuah Israel hian bomb lehin Gaza-ah mi 28 an thi leh hman a ni.
Inremna thawh khatna kalpui mek hi a derthawng hle a, Thawhtanniah pawh khan tharum thawhna a la thleng a, US chuan lehlam lehlam hi buaina titawp turin a nawr mek zel.
US palai, Steve Witkoff leh Trump-a makpa, Jared Kushner te chuanh president-in inremna tur point 20 a rawta hmabak la awm zelte pawm a nih theih nan hma an la mek zel a, thil hautak erawh a nih hmel.
US Vice President JD Vance-a pawhin Thawhlehni khan a Israel tlawh turin ruahmanna a awm a, Netanyahu-a nen inbiain chona leh hmabak remchang awmte an sawi dun ang.
US palai dangte pawhin Thawhtanni zan khan Egypt-ah Hamas hotute an dawr bawk.
Palestinian damdawi inte chuan Thawhtanni khan Gaza atanga Israeli sipaite inhnuhkirna chin, ‘yellow line’ an siam bulah Israeli sipaite tank kahah mi pathum an thi leh niin an sawi a. Sipaite hian ramri kham chin pel hel an kap tih an sawi.
Gaza City-a chengte chuan ramri siam hi a chiang lo niin an sawi a, electronic map a awm a; mahse, a takah chhinchhiahna a awm mumal lo tih an sawi.
Israeli defence minister erawh chuan Thawhtanni khan bulldozer-in lung tlang eng nawr khawma ramri a siam lai video a dah chhuak thung.
Witkoff-a leh Kushner-a ten Israel an tlawh hi tharum thawhna thlen thar leh hmaa Trump-a ruahmanna awm sa la hmabak sawipui tura kal tum sa an ni tih US leh Israel thuneitute chuan an sawi.
Trump-a chuan inkahhai hi a la awm reng tih an sawi a, Hamas hruaitute chu a bawhchhiatnaah hian an inhnamhnawih lo mai thei tih a sawi bawk.
Israel hian hmabak la awm atana inbiakna kalpui zel chu mi hren ruang an hmuh kim hma chu an tum a rinawm loh va, Hamas hian ruang paruk hlan leh tawhin Gaza-ah 16 an la awm a. Hengte hi in chim chhe kara hai chhuah harsa tak an ni tawh hlawm.
Israel leh Hamas hian inkahhai chu an la kalpui reng tih an sawi ve ve a. Israel hian an beih leh chhan chu Gaza chhim lam, Rafah-a Palestinian-ten an sipai pahnih an thah phuba lak nan an bei let niin an sawi.
“Israel chuan Gaza Strip-a inkahhai bawhchhiatna a pawm ngai dawn lo,” tiin sorkar thupuangtu chuan Thawhtanni khan a sawi a, Hamas chuan Gaza-a engmah thuneihna an nei tawh lo va, an ralthuam an dah vek tur a nih thu a sawi bawk.
Hamas sipai pawl, an ralthuam tung tura tihna duh lotute chuan Rafah-a buaina chhuaka tel pawl nen khan March atangin inbiakpawhna an nei tawh lo niin an sawi ve thung.
Hamas hian Israel-in inkahhai bawhchhiain mi 46 an thi tawh a, puihna an luhtir duh lo bawk tih an sawi.