Myanmar sipaiten scam centre an dapah mi 2,000 chuang man

Myanmar sipaiten scam centre an dapah mi 2,000 chuang man
Myanmar-a sipaiten Thailand nena an inrina bul lawka scam centre lian tak an luhchilhnaah mi 2,000 chuang an man niin an sorkarin a puang.
He hmun zau tak hi khawvel huapa mi sual pawl inzawm khawmten dan lova pawisa khelhna, sum chhehrelhna, online-a inngaihzawnna leh investment lem an tihna hmunpui niin Myanmar Alin chanchinbu chuan a tar lang.
Chanchinbute chuan in chhawng sang lem lo tak tak 250 chuang dap niin an sawi a, heng zingah hian kudam leh dawr pawh a tel.
Sipaite hian Starlink satellite 30 an man tel bawk niin Myanmar Alin chuan Thawhtanni khan a tar lang.
Satellite hi Elon Musk-a SpaceX hnuaia Starlink-in an siam a ni a, hung chhung hi power a awm loh pawha internet-a thlun zawm theih nan an hmang a ni.
Thuneitute chuan mi 2,198 an man zinga 445 chu hmeichhia a, an ni a, mipa 1,645 bakah mipa dang, venhim hna thawktu 98 an man tel tih an sawi a, khawi ram mi nge an nih erawh sawi lan a ni lo.
KK Park hi Kayin State-a Myawaddy Township-a awm niin a bula lui luang chu Thai ramri niin lehlamah hian Mae Sot khua a awm.
Heng lai hmun hi Myanmar sipai leh sipaiten kum 2021-a an paih thlak tak mipui sorkara an aiawha an thlanten an din, National Unity Government sipai pawl, People’s Defence Force inbeihna hmun a ni a. Karen hnam hel nen pawh an inbei nasa bawk.
Myanmar-ah hian kum 2021-a sipaiten thuneihna an chan leh hnuah sipai leh anmahni duh lotu mipuite an inbei nasa hle.
Sipai thupuangtu, Major-General Zaw Min Tun-a chuan KK Park-a thil tihna velah hian sipaite nena indo reng, Karen National Union-a an hotu lawkte pawh an inhnamhnawih nasa niin a sawi tih Associated Press news agency-in a tar lang.
Myanmar hi Thailand leh China chuan scam centre awmte laka khauh zawka che turin a nawr ve reng a. A bikin Chinese crime syndicate tam tak chhuahna nia ngaih a ni.
Scam centre-a thawk tam tak hian bum chhuaha chhawr niin an insawi hlawm a, hlawh tha tak pek intiamin online-in an dil a, sal tluk leka chhawr an ni leh thin si niin an sawi tih mihring dikna chanvo humhalhtuten an sawi.
Thai police chuan Myanmar nena an inrina velah ringawt hian hetiang hmunah hian mi 1,00,000 vel an thawk nia an hriat thu an sawi.
Scam centre an tih mai hi tun hnai kum nga chhungin Asia chhimchhak ramah a pung nasa hle a, Myanmar leh Cambodia hi a tamna ber niin kum tin ram hrang hranga inzar pharh mi sual pawlten dollar tluklehdingawn tel an siam chhuahna a tling.